POSIBLING mawad-an sa ilang panginabuhi-an kining 3,000 ka mga Angkas drivers dinhi sa Sugbo.
Kana kon maaprobahan kining girekomendasyon karon sa Technical Working Group (TWG) sa Department of Transportation (DOTr) ngadto sa Kongreso nga hunongon na ang pagtuon kon angayan bang tugotan nga makapamasahero ang mga single-motorcycle.
Anaa man gud karo’y napending nga balaodnon sa Kongreso nga naglatid nga ma-legalize ang pagpamasahero sa single motorcycle.
Tungod niini, gitun-an karon sa mga magbabalaod kon angayan ba kining aprobahan ug ikonsiderar nga usa ka matang sa public utility vehicles (PUV) ang mga motorsiklo.
Apan kon matugotan kining rekomendasyon sa TWG nga hunongon na ang pagtuon, si Eduardo Montealto Jr., ang Central Visayas regional director sa Land Transportation Franchising and Regulatory Board (LTFRB), miingon nga dili sila magpanuko sa pagsikop sa mga sakop sa Angkas kon mopadayon sa ilang operation kay ila kining ideklarar nga illegal.
Pero taym pa una. Dunay rekomendasyon si Antonio Gardiola, chairman sa TWG, ngadto sa LTFRB nga ipa-blacklist ang Angkas kon tugotan man gani sa Kongreso ug Senado nga makapamasahero ang mga motorsiklo.
Rason ni Gardiola kay daghan og kalapasan nga nahimo ang Angkas samtang nagpadayon ang pagtuon kon angay bang tugotan kining makapamasahero.
Pastilan. Mora man og giinitan og maayo ang Angkas ning mga ahensiyaha. Kon violations lay hisgutan, nganong di man sila ka dakop nianang mga habalhabal nga klaro man nang dunay kalapasan? Uban diha wa gani mga rehistro ug grabe ra mokolekta og plite.
Dili kaha tinuod nga dunay laing kompaniya nga gustong ipuli sa Angkas nga gipaluyohan og pulitiko? Kini maoy atong atngan.