SUKWAHI sa gipagulang taho nga naalibyuhan gamay ang power supply dinhi sa Mindanao human giingong aduna na la'y 520 megawatts nga kakuwangon sa kuryente niadtong Miyerkules, nasinati sa pipila ka mga dapit sa Davao del Sur ang taas kaayong oras sa brown-out.
Ang gipagulang iskedyul sa Davao del Sur Electric Cooperative (Dasureco) niadtong adlawa, magsugod ang pagkapawong sa kuryente alang sa mga porsyon sa siyudad sa Digos, mga lungsod sa Matanao, Bansalan ug Magsaysay, gikan alas 6 hangtud alas 11 sa gabii.
Apan sa kalit lamang, nipagawas og mando ang National Grid Corporation of the Philippines (NGCP) ngadto kanila sa pagpawong sa kuryente bandang ala 1:00 pa lang sa hapon.
Mas napungot pa ang katawhan human nahitabo ang siyam ka oras nga brown-out kay nibalik kini alas 10:00 na sa gabii.
Miyerkules sa buntag dihang nagpagula og taho ang NGCP nga nisaka na gamay ang tubig didto Pulangi river ngadto sa 284.4 meters.
"The higher elevation of the Pulangi river was due to the accumulation of water in the evening. The estimated maximum elevation of Pulangi river is at 285.5 meters," sigun sa NGCP.
Apan luyo niini, ang main power sources sa Mindanao grid nga hydro power plant sa National Power Corporations didto Agus ug Pulangi, dili gihapon makalahutay sa suliran sa El Niño.
Nasayran gikan sa NGCP nga ang pag-ubos sa supply niadtong adlawa dinhi sa Mindanao mao ang lower peak demand nga anaa lang sa 1,384 MW ug aduna sila'y available capacity nga 864 MW.
Ang opisyal sa Dasureco engineering department nga si Engr. Edcil Lureca, sa pakighinabi sa Sun. Star Superbalita namahayag nga dili sab makahatag sa saktong tubag kun nganong taas kaayo ang oras sa pagpawong sa 69 KV nga ilang linya.
"Sige mi og tawag nila pero wala pa gyud daw nibalik sa normal," si Lureca nga nahinabi pasado alas 8:00 sa gabii sa iyang telepono nianang adlawa.
"Usahay maglibog mi kay last night, normal naman siya mga alas 7:12 sa gabii pa lang. Usahay gani moabot pa ang 15 hours ang gitas-on sa brown-out nga dapat 8 hours lang man unya ang ubang utility dili man ingon ana," sulti niini.
Nanaghap hinuon ang pipila nga adunay gipaboran nga laing power utility ang NGCP tungod kay dinhi lang sa probinsya nahitabo ang maong sitwasyon.
Daghan sab natingala kun nganong nahimo sa NGCP nga di pawngon ang kuryente atol sa duwa ni Manny Pacquiao ug Joshua Clottey niadtong Dominggo.
"Mura man hinuon og ila lang gidulaan ang katawhan sa pagpahimulos sa hulaw kay kontrolado man nila ang bisan unsa nga oras nga palungon kini," usa ka di magpailang molupyo nagkanayon.
Gisuwayan og tawag sa Superbalita ang NGCP apan wa mitubag bisan sa gipadalang text message kun unsay rason sa nagka-grabeng gitas-on nga mawala ang kuryente sa lalawigan.
Kagahapon sa buntag, kalit nahanaw ang kuryente mga alas 9:30 sukwahi sa iskedyul nga ala una hangtod alas 6 sa gabii.
Nakaabot sa Superbalita nga naglantugi ang Dasureco ug NGCP human nga di niini basta mapalong ug talagsa ra sab kaayo ang linya sa Sta. Cruz, Davao del Sur.
Niguwa sab karon ang hungihong nga daw gisakyan na hinuon sa mga power suppliers ang giatubang nga hulaw sa Mindanao tungod kay mas nisamot ang gitas-on sa oras sa brown-out sa lalawigan ug bisan sila wa makahatag og saktong pagpasabot sa katawhan. (Orlando B. Dinoy)