USA ka estudyante ang gibiktima sa wala mailhing sakop sa Bukas Kotse Gang samtang giparada ang iyang sakyanan duol sa Ateneo de Davao University didto sa Acacia Street, Juna Subdivision, siyudad sa Davao niadtong Martes.
Ang biktima mao si Arnel Doping, 23, ulitawo, estudyante sa Ateneo de Davao University ug nagpuyo sa # 018 Oasis Street, Ecowest Drive, Ecoland.
Si Doping nagbutyag sa kapulisan nga giparada niya ang iyang Mitsubishi Adventure (plate number LFA-202) sa alas 2:00 sa hapon apan sa iyang pagbalik sa alas 7:30 sa gabii nabuak na ang bintana sa iyang sakyanan.
Matud ni Doping nga gikuha sa mga kawatan ang iyang dakong bag nga Nike nga dunay sulod nga senina, cellular phones, Sony Play Station nga nagkantidad og P11,500.00 ug cash nga nagkantidad og P1,000.00.
Tungod sa nahitabo, midangop ang biktima didto sa Talomo Police Station ug gipatala ang insidente sa pamasin nga mahibalik kaniya ang iyang mga butang.
Human masayud ang kapulisan, si SPO2 Reynaldo Gustilo sa Talomo Police Station miadto sa nahitaboan sa krimen aron magsusi kung dunay mga tawo nga nakakita sa pag-atake sa mga kawatan. (AD)