2 ex-convict nadakpan sa buy-bust

DUHA ka ex-convict ang nadakpan na sab tungod sa pagkalambigit sa ilegal nga drugas atol sa buy-bust operation nga gipahigayon sa Basak Police Station sa North Road Street, Barangay Jagobiao, Mandaue City Huwebes, Enero 30, 2020.

Giila ang mga suspek nga silang Rendon Gerundio, 28, taga Barangay Nangka, Consolacion ug si Felipe Misa, 33, taga Baranagy Pulpogan, Consolacion.

Si Gerundio unang nadakpan buwan sa Mayo miaging tuig sa kasong frustrated murder samtang si Misa nasikop sa susama nga kaso sa paglambigit sa illegal nga drugas nga nakalapas sa Republic Act 9165 Sec. 5 ug Sec. 11 niadtong 2017.

Nakuhaan ang duha ka mga suspek og trese ka pakiti sa gidudahang shabu nga adunay kinatibok-ang gibug-aton nga 16.52 ka gramos nga nagkantidad og P112,336.

Si Gerundio ug si Misa kasamtangang anaa sa kustodiya sa Basak Police Station sa Dakbayan sa Mandaue. (KFD)