DUHA ka mga construction workers ang gitambalan karon sa mga doktor sa Davao Medical Center (DMC) human sila gipusil sa duha ka wala mailhing mga tawo sa alas 2:00 pasado sa kaadlawon kagahapon didto sa Bajada, siyudad sa Davao.
Ang insidente nahitabo luyo sa hugot nga pagpatuman sa mga otoridad sa gun ban nga giimplementar sa Commission on Elections (Comelec).
Si Senior Police Officer 2 Henry Balbiran, imbestigador sa Sasa Police Station, nag-ila sa mga biktima nga mao sila Alfonso Daigdigan, 30, minyo; ug Charlie Tejero, 20, pulos lumad nga taga Bukidnon province ug nagpuyo sa Carmelite Road, Bajada.
Matud ni Balbiran sa iyang spot report nga naglakaw ang duha ka mga biktima kauban ang ilang higala nga si Ricky Ochege pauli sa ilang gipuy-an gikan nag-inom apan kalit silang giatangan sa duha ka mga tawo.
Ang duha, suma sa imbestigasyon, nagdala og wala matino nga kalibre sa armas dayon gipusil ang duha sa walay igong hinungdan.
Si Daigdigan naigo sa iyang ulo samtang si Tejero naigo sa iyang tiil mao nga gidala sila sa DMC diin gideklara nga kritikal ang kahimtang ni Daigdigan.
Human sa pagpamusil, giingon nga yanong naglakaw ang duha ka mga tawo nga namusil sa mga biktima ngadto sa wala masayri nga lugar.
Samtang gitambalan ang mga biktima, gisusi sab sa kapulisan ang motibo sa maong hitabo aron masayran kung kinsa ang mga mipusil sa mga biktima.
Sa laing bahin, usa ka sundalo ang gitambalan sa DMC human siya gidunggab sa alas 10:00 sa buntag niadtong Miyerkules didto sa Panacan Public Market.
Ang biktima mao si Segeant Diomedes Minao, 38, sakop sa 10th Infantry Division sa Philippine Army nga nakabase sa Camp Apolinario Panacan.
Si Minao giingon nga gisundan sa suspetsado nga nailhan lang sa pangalan nga Charlie, 18, nagpuyo sa Panacan gikan nag-inom sulod sa usa ka videokehan sulod sa Panacan Public Market.
Ang biktima naigo sa iyang walang bukton mao nga gidala siya sa DMC samtang ang suspetsado daling mibiya sa maong lugar mao nga gipangita siya sa kapulisan. (AD)