NAPAHILUNA na sa hingpit ug nahatagan na og desenting lubong ang kalabera sa amahan nga napalgan sa creek human nga nawala upat na ka tuig ang milabay.
Human miagi sa hustong proseso, giila sa pamilya ug mga kabanay nga ang kalabera nga napalgan mao ang nawalang si Domingo Largo, 53, kinsa sumala pa, wa na makauli sa ilang panimalay sukad niadtong Disyembre 2015.
Subay sa report, si Dobel Narido Largo, 26, minyo nga taga Purok 16, Barangay Ngan, Compostela, Davao de Oro, midangop sa Compostela Municipal Police Station ug mitaho nga ang biktima, kinsa iyang amahan, nawala sukad pa niadtong ikatulong semana sa Disyembre 2015.
Apan alas 11:00 sa buntag niadtong, Enero 24, ning kasamtangang tuig, gipahibalo sila sa ilang silingan nga si Brando Padilla nga adunay napalgang kalabera sa tawo haduol sa creek sa ilang dapit.
Ug sa dihang giadtoan, nasuta ni Dobel nga ang maong kalabera, iya sa nawala niyang amahan nga si Domingo gumikan sa t-shirt nga gisul-ob.
Sa maong hitabo, ang Compostela police dayong nakig-alayon sa Compostela Municipal Health Center alang sa hustong proseso sa napalgang kalabera.
Hugot nga gibarugan sa pamilyang Largo nga ang maong kalabera iya sa nawala nilang padre de pamilya.