SABADO sa hapon sa alas tres ang takna. Bag-o lang nga nakapamalit og groseri si Alyana sulod sa CT Mall, bag-ong Mall nga giablihan sa dakbayan sa Sugbo ning tuiga. Misud siya sa Bumble Bee aron motimo una mopauli. Daghang nangaon dinhi, apan nakakita siyag usa ka bakanteng lamesita nga alang sa duha ka tawo. Milingkod siya ug gipahimutang niya ang shopping bag ibabaw sa gamayng talad aron masabtan nga may nag-ukopar na niini. Milinya siya sa atubangan sa counter. Pag-abot sa iyang turno mi-order siyag hamburger ug iced tea.
Pagbalik niya sa lamesita gibalhin niya sa salog ang shopping bag ug misugod og kaon. Unya dihay lalake nga miduol sa iyang talad nga nagdala og trey.
“May I share your table, Ma’m ? Wa na may bakante nga akong nakita,” matod sa lalake.
Guwapuhon ang lalake nga nag T-shirt og asul. Kulungon siyag buhok ug way balbas o bigote. Clean shaven. Nagpahiyom kini. Sa iyang bahin si Alyana nagsul-ob og puti nga blawos ug pulang sayal nga mini-skirt.
“Sure! Feel at home!” ni Alyana nga mibawos pagpahiyom.
“I’m Enriko. Riko for short,” paila sa lalake nga milingkod atbang kang Alyana.
“I’m Alyana. Call me Yana,” paila pod ni Alyana sa iyang kaugalingon.
Samtang nangaon sila nahisgutan nila diin sila ni-gradwar sa hayiskol mga unom na ka tuig ang nakalabay. Ka-batch diay sila sa Abellana National School.
“Nahinumdom na ko nimo, Yana. First honorable mention ka!” ni Enriko nga mitutok sa matahom nga nawong ni Alyana. “Section One man mo tanang mga honor. Lakip na ang valedictorian ug salutatorian. Taga Section Seven man mi. Enriko Espina tibuok ngan ko. Runner ko sa Senior Team sa intramurals.”
“Enriko Espina?” ni Alyana. “It rings a bell. Nakadungog na ko niadto sa imong ngan.”
Nagpadayon ang ilang panaghimamatay bisan nahuman na silag pangaon. Nagkahibaw-anay sila nga pulos pa sila way-kabilinggan sa kinabuhi. Si Alyana naa magtrabaho sa DepEd ug si Enriko, CPA in public practice. Katalirungan sila sa edad nga bayenti kuwatro. Sa dayon na nilang panagbuwag, naghatagay sila og numero sa ilang selpon.
SULOD sa iyang lawak wa dayon mahikatulog si Alyana. May giutingkay siya sa aparador. Nahinumdom siya nga nabasahan niya somewhere ang ngalan ni Enriko. Gipangita ang iyang slum book. Gitagsa-tagsa niyag basa ang mga ngalan sa iyang mga klasmeyt nga nasulat didto, lakip na ang iyang mga higala nga taga laing Section. Ug diha sa tunga-tunga sa slum book Nakita niya ang ngalan ni Enriko Espina, apan way mga personal detail. Ang ngan lang niini. Sa remarks, nabasa niya kini: I HOPE TO SEE YOU IN THE FUTURE!
Misantop sa hunahuna ni Alyana nga tingali napasa sa iyang mga klasmeyt ngadto sa Section Seven ug bisag dili sila kaila si Enriko kaniadto, nisulat kini sa iyang ngalan dinhi. Unya mihukom siya nga tawgon sa selpon si Enriko ug pahibaw-on sa iyang nadiskubrehan.
“Nakasuwat diay ko sa imong slum book? Karon pa ko makahinumdom!” ni Enriko.
“Yes, Riko!” ni Alyana nga tam-is kaayog pahiyom.
“So, it’s time for me to celebrate the discovery with you. I’ve seen you now!” ni Enriko. “May I invite you for lunch tomorrow?”
“Okey! Pero manimba una ta sa Basilica ni Sto. Nino. Adto ta magkita!” ni Alyana.
“Okey! Good night, Yana!”
“Good night, Riko!” Ug mihigda si Alyana sa iyang kama nga naghunahuna sa kaambungan ni Enriko.
PAGLABAY sa tulo ka buwan mibagting ang kampana sa Cebu Metropolitan Cathedral alang sa kasal nilang Alyana ug Enriko. (Katapusan)