KUNG maghisgot man gani ta sa lugar nga Vienna, di nato kalikayan nga ‘sausage’ ang mosantop sa atong hunahuna.
Nabantog ang Vienna sa nasud sa Austria sa maong pagkaon o processed meat nga mas nailhan nga “kasekrainer.”
Sa higayon nga makasuroy mo sa maong dapit gikinahanglan nga dili mo masipyat sa pagtilaw sa ilang sikat nga local food nga “wiener schinetzel”, pork chop nga adunay breading mix nga itlog, harina ug bread crumbs dayon giprito kon common tawgon nga breaded porkchop.
Usa ang Vienna nga nahimo nakong paborito nga food destination sa akong pagsuroy-suroy sa pipila ka mga nasud sa Europa.
Kon ikaw makahigayon sa pagduaw sa maong lugar ania koy guide o tip nga angayon nimong buhaton sa maong Austrian capital.
Giya sa pagsuroy
Dasok sa makasaysayanong straktura, kultura ug uban pa ang Vienna gikan sa mga edipisyo ug mga museo nga nahimutang sa nagkadaiyang suok sa dakbayan gawas sa lamiang pagkaon niini.
Sa unang adlaw ninyo sa pagpanuroy mas maayong unahon ninyo og adto ang city center diin inyong mabisita ang mga major spots dinhi ilabi na ang St. Stephen Cathedral nga giisip nga motherchurch sa Roman Catholic Archdiocese sa maong dapit.
Ang maong cathedral nagsilbi sab nga simbolo sa dakbayan nga maoy saksi mga importanteng panghitabo sa paghari sa pamilyang Habsburg ug kaysaysan sa nasud.
Duol sab sa center ang Rathaus, ilang city hall, ang imperial palace nga The Habsburg nga maoy puy-anan ug buhatan sa ilang mayor ug ang nabantog nga Vienna State Opera House.
Daghan sab ug mga museo duol o tapad sa maong mga edipisyo maong di mo mahutdan og mga talan-awon.
Sa inyong ikaduhang adlaw, mahimo ninyong bisitaon ang Schonbrunn Palace, ang giisip nga usa sa mga pinaka-importanteng architectural, cultural, ug historical monument.
Ang baroque-style nga palasyo maoy summer residence sa mga Habsburg ug kini nagsilbing tourist attraction sukad 1950s.
Dako ang maong palasyo ug ang dapit sa kinatibuk-an mahulog nga sulod sa usa ka adlaw sa pagbisita dinhi.
Sa ikatulo nga adlaw, mahimo kamong mag-shopping o sightseeing duol sa city center.
Base sa pagkisusi ning tigsuwat, mas barato ang mga kan-anan, mga restaurant kung medyo layo kini sa city center.
Angay sad ninyo nga hinumduman nga sagad sa mga establisamento sa Vienna ilabi na mga tindahan, grocery stores ug ubang shopping centers manira sa 6:00 sa gabii.
Livable City
Nindot ang Vienna og dili mo magmahay nga maoy hingundan og di ikalimod nga ang Vienna maoy gi-ila sa pasidungog isip “the most livable city” sa tibuok kalibutan sud na sa 10 ka tuig, base sa Mercer’s international comparative study.