KAPIN P40 mil ang nakolekta sa mga tulisan human gitulis ang usa ka bus niadtong Miyerkules mga alas 9:20 sa gabii sa Carmen Hill, Upper Puerto ning siyudad sa Cagayan de Oro.

Gitulis sa lima ka mga lalaki ang Rural Transit Mindanao Inc. nga bus nagdala og body number 2322 nga gimaneho ni Joseph Madelo, 37, taga Zone-8, Cugman uban sa konduktor nga si Ronald Romaquira, 31, taga Lapasan ning siyudad.

Ang mga tulisan nagpatuong mga pasahero.

Si Police Senior Inspector Norberto Zafra sa Police Station 6 (PS6) sa Puerto nibutyag sa Sun.Star Superbalita nga gikan sa Kibawe ang maong bus ug padulong ning siyudad.

Paghidangat sa siyudad sa Valencia, Bukidnon duha ka mga lalaki ang nisakay ug gisundan dayon pagsakay sa laing tulo paghidangat sa boundary nga bahin sa siyudad sa Malaybalay.

Paghidangat sa Alae, Manolo Fortich usa sa maong mga tulisan ang nikanaog ug paghidangat sa Upper Puerto nideklarar dayon og tulis ang mga suspetsado.

Nanion og pistola ang mga suspek ug gipahunong si Madelo sa pagmaneho.

Gipangkuha ang kwarta nga mobalor og P300 ug cellphone gikan sa drayber, sunod nga gitionan ang konduktor nga si Romaquira ug nakuha gikan niini ang koleksiyon nga mobalor og P18 mil uban gihapon sa cellphone.

Apil sa gitulis ang pipila ka mga pasahero nga mao sila si Alfredo Mahumot, 42, minyo, taga P-2, Puerto ning siyudad, usa ka fish vendor, ug nakuha gikan niini ang iyang personal nga kwarta mobalor og P15 mil; Retired Technical Sergeant Wilfredo Cagubcob, 48, taga Bulua ning siyudad, nga nakuhaan og P7 mil uban sa cellphone ug Mirasol Cumilang, 26, taga Zone-5, Cugman ang nakuhaan gihapon og P530 uban sa cellphone.

Matud ni Zafra nga mobalor tanan og P40 mil kapin ug lima ka mga celphone ang nakuha samtang dali nga ningsibat ang mga suspetsado sakay sa gituohang getaway vehicle.

Human sa hitabo, giplano dayon sa kapolisan ang operation sikop batok sa mga suspetsado human mireklamo ang mga biktima sa PS6. Usa ka concern citizen ang wala magpaila ang nitudlo sa usa ka suspetsado hinungdan sa pagkasikop sa usa ka suspek nga mao si Ricky Tizon-Laureo, 36, minyo, taga Zone-7, Agusan ning siyudad.

Atol sa pagkasikop wala miangkon ang biktima apan sa interogasyon nakasulti kini sa hideout sa laing mga kauban niini. Nasayran nga ang hideout sa maong mga tulisan anaa sa lungsod sa Tagoloan, Misamis Oriental.

Uban sa mga sakop sa City Mobile Group (CMG), City Intelligence Detective Unit ug mga sakop sa PS6 nipahigayon og operasyon kagahapon mga alas 1:00 sa kadlawon ug maayong pagkasapon sa hideout sa mga suspetsado nga anaa sa Ganghaan, Sta.Cruz, Tagoloan hinungdan sa pagkasikop sa laing tulo nga mao sila si Mario Inot-Pilit, 32, taga Brgy Sta.Ana, lungsod sa Tagoloan; Vicente Basubas, 33, sa susamang dapit, ug Alla Refuela, 37, minyo, lumad nga taga Cabanglasan, Malaybalay, Bukidnon ug kasamtangan nagpuyo sa maong dapit.

Gani nisuway pa sa pagsukol si Refuela sa kapolisan hinungdan nga napusilan ang abaga niini ug tiil, diin ning panahona nilanding na Northern Mindanao Medical Center (NMMC).

Nakuha sa area ang mga himan sa pagpanulis sama sa duha ka mga kalibre 38, usa ka hand grenade, anti riot grenade, 45 cal plastic toy gun, lima ka bonnet, jacket, XRM motorcyle nga kolor itom adunay kombinasyon nga pula ug walay plate number, assorted keys, mga ID sa mga biktima, lima ka walay sulod nga pitaka ug kwarta nga nabinlan na lamang sa P7,500.

Sa pagsulat ning balita gibalhog na sa Maharlika Detention Cell ang mga tulisan diin giandam na ang kasong pagpanulis batok kanila.