UBAY-UBAY nga mga cellphone ang nakuha gikan sa mga pasahero human gitulis ang bus sa tulo ka mga wala mailang suspetsado kagahapon mga alas 3:45 sa kadlawon sa Brgy. Agusan ning siyudad sa Cagayan de Oro.
Nagpatabang sa Police Station 10 (PS10) sa Cugman ang driver sa Lipunan Transit nga mao si Elvie Magto, kauban sa pipila ka mga pasahero nga mao si Alger Aw-aw ug Romar Enterina.
Si PO2 Rudolfo Ernace sa PS10 nga nahinabi sa Sun.Star Superbalita niingon nga daghan pa sa mga pasahero ang nabiktima sa pagpanulis apan wala na niuban sa driver aron magpa-blotter.
Gisaysay sa driver nga paingon ning siyudad ang bus dihang tulo ka mga lalaking nagpatuo nga mga pasahero ang nisakay sa unahan sa Puerto nga bahin ning siyudad.
Apan paghidangat sa Agusan nga bahin kalit lang nga nideklarar og hold-up ang mga suspek ug nanion og kutsilyo ngadto sa mga pasahero.
Gipangayo ang ilang kwarta uban sa nagkadaiyang mga cellphone. Giingong moabot sa napulo ka mga cellphone ang nakuha uban sa kwarta nga P170, wala pay labot ang nakuha gikan sab sa laing mga pasahero.
Gani human nakuha ang mga cellphone nagmando pa ang mga suspek sa driver nga maghinay kay manganaog na.
Walay pasahero nga nisuway sa pagsukol sa mga tulisan labina armado ug kutsilyo ug sa kahadlok nga dunggabon.
Ang kaso giduso sa Police Station 6 (PS6) sa Puerto labina nga ang insidente nahitabo sakop sa pa sa PS6.