NASIKOP sa mga sakop sa City Mobile Force Company CMFC sa Cebu City Police Office ang usa ka freelance basketball player nga gideklara nga number 1 most wanted person sa lungsod sa Malabuyoc, lalawigan sa Sugbo sa kasong three counts of rape.
Ang akusado nasikop sa Barangay Basak, Siyudad sa Lapu-lapu, ala 1:30 sa Miyerkules sa hapon, Enero 29.
Ang nasikop pinasikad sa warrant of arrest nga giuluwatan ni Judge Marlon Jay Moneva, acting presiding judge sa Regional Trial Court (RTC) Branch 20 sa Dakbayan sa Sugbo giila nga si Gerald Sabac Legarde, taga Poblacion 2, lungsod sa Malabuyoc.
Matod ni Police Lieutenant Colonel Randy Korret, hepe sa CMFC, nga ilang nakita sa monitoring si Legarde nga naa ra General Maxilom nagtago-tago sulod sa duha ka tuig.
Tungod niini, nangita silag paagi nga makuha nila ang akusado pinaagi sa pag kontak sa iyang higala nga usa usab ka basketball player.
Usa sa mga kauban ni Legarde gipahibawo sa kapulisan nga adunay warrant of arrest ang ilang higala nga angay na nilang dakpon.
Giagni nila ang akusado nga moduwag basketball sa Dakbayan sa Lapu-Lapu bugti sa P2,0000 nga gisanong usab dayon niini.
Didto na nila gipahibawo si Legarde nga aduna kini warrant of arrest sa kasong tulo ka ihap nga pagpanglugos ug ilang gidala sa CCPO.
“Nahanap sya ng research team natin kasi may coordination ako sa Cebu province, Bohol at lahat ng provinces. So, ni check ko, doon sa cyber patrolling natin nakita natin na ang late address nya doon sa posting nya sa Facebook nasa Mango,” matod ni Korret.
Nakurat ang akusado nga nalutsan siyag warrant of arrest, apan malinawon ra usab nga nikuyog sa mga pulis.
Naila nga maayo nga moduwag basketball ang akusado sa General Maxilom ug kanunay dalhon sa lain-laing dapit ug bayran og P2,000 kada duwa.
Wa masayod ang iyang mga kauban nga aduna kini kaso nga giatubang human gitumbok sa menor de edad nga 19 anyos na karong tuiga nga maoy nilugos kaniya. (AYB)