‘Cardo’ patay sa engkwentro; hepe: operation lihitimo

GIPANALIPDAN sa officer-in-charge sa Cebu City Police Office ang mga operatiba sa Waterfront Police Station nga nakapusil patay sa ilang target sa anti drug operation sa sitio ICM, Villagonzalo 2, Barangay Tejero siyudad sa Sugbo alas 10:45 sa Miyerkules sa gabii, Enero 29, 2020.

Si Ricardo Solante Valdueza, alyas Cardo, 51, taga U. Alviola st., giingong nisukol sa mga pulis sa dihang dakpon na unta human mamusil og usa ka silingan niyang maglawog unta sa mga iro.

Si Cardo gikan niikyas sa mga pulis nga ning buy-bust kaniya ug sa iyang asawa ug siya nisulod si compound sa ilang silingan ug nipusil kang Joel Josun Ouano.

Matod ni Police Colonel Engelbert Soriano, officer-in-charge sa CCPO, nga lehitimo ang operasyon sa iyang mga sakop.

Si Police Major Joemar Pomarejos, hepe sa Waterfront Police Station, nibutyag sa Superbalita Cebu nga si Valdueza ug asawa niining si Barbra, 46, ang ilang target.

Dihang nakabantay si Cardo nga mga pulis ang iyang gika-transact, dali kining niikyas.

“Usa sa akong mga operatiba gali nga maayo na lang nga nakabantay ug nakatago nga giaksiyonan og tion, apan nakaatras lang kay delikado ang sitwasyon. Mao nang nakasibat siya,” matod ni Pomarejos.

Himuon na unta ang inventory dihang nakadungog sila og mga buto sa pusil sa duol.

Ang uban niyang mga sakop ningresponde sa pagpamusil.

Unang niabot sa Sityo Back Blessed Sacrament sa maong barangay ang Mobile Patrol Group ug ubang mga sakop sa Waterfront Police.

Nasayran sa mga pulis nga ang gunman naa sulod sa Menchavez compound, apan di usab segurado ang mga tagbalay ug silingan kon naa pa ba sa sulod si Cardo.

Wa usab dayon sila masayod nga ang namusil mao ang ilang gi buy-bust.

Si Cardo giingong gisita ni Ouano dihang nakabantay ang nauwahi nga dunay tawo nga nisud sa compound.

Wa mokompyansa ang mga pulis sa pagsud sa gate hinungdan nga dihang namusil si Cardo makaduha, way naigo kanila. Gibaslan siya sa pagpusil sa mga pulis ug nahagba human maigo.

Didto na nila nahibaw-an nga si Cardo diay ang ilang naengkwentro. Nilanat og mga 10 minutos ang engkwentro.

Si Cardo daling gidala sa Cebu City Medical Center (CCMC), apan namatay.

S Ouano gisunod sa pagdala, naa sa tambalanan nagpaalim sa samad.

Sa crime scene narekober sa Scene of Crime Operation (SOCO) ang P500 ni Cardo ug kalibre .45 nga pistola nga dunay duha ka mga magazine ug mga kabhang sa bala.

Way kalapasan

Matod ni Police Colonel Engelbert Soriano nga wa siyay nakitang kalapasan sa iyang mga sakop tungod kay nisukol man ang ilang target.

“It was a buy-bust operation. Legitimate buy-bust operation and nagulat yung tropa natin nang bigla na syang nagpaputok,” matod ni Soriano.

Gi-monitor usab nila ang sitwasyon ni Ouano sa tambalanan. Dali usab nga miadto sa Tejero si Police Brigadier General Valeriano de Leon aron masusi ang kahimtang sa iyang mga sakop.

Miyembro sa usa ka sindikato sa illegal nga drugas si Valdueza nga naglihok sa dakbayan ug lalawigan sa Sugbo.

Gihulagway kini ni Soriano nga adunay daghang drug group nga naa sa siyudad sa Sugbo diin ang mga sakop dugay na sa ilegal nga negosyo ug ang uban bag-o pa usab.

Moabot ngadto sa 50 ka mga drug personalities ang naa sa listahan sa Cebu City Police Office nga padayon nila nga gibantayan.