MATALAM, North Cotabato -- Tibway ang kinabuhi sa usa ka most wanted person sa Soccsksargen human misukol sa mga awtoridad alas 9:15 sa buntag, Huwebes, Enero 30.
Giila ang suspek nga si Toni Palti, 39, minyo, nag-atubang og kasong carnapping with homicide ug molupyo sa Purok Mansanilla, Barangay Poblacion sa nahisgutang lungsod.
Gibutyag ni Matalam Chief of Police Major Joseph Brian Placer nga ilang gironda ang balay sa suspek uban ang mga sakop sa Cotabato Police Public Safety Company ug militar.
Apan sa diha nga nakit-an ni Palti ang mga pulis, abtik kining milanit sa iyang armas hinungdan nga gi-unhan siya sa raiding team.
Patay on the spot ang suspek nga nakaangkon og upat ka samad pinusilan sa nagkadaiyang parte sa lawas.
Narekober gikan sa posisyon ni Palti ang usa ka.38 revolver ug mga bala. (Edgar E. Fuerzas)