DAVAO DEL NORTE -- Duha sa tulo sa mga tulisan nga nanulis og bakery balhog na sa prisohan samtang ang laing usa gitunol ngadto sa Women and Children’s Protection Desk human madakpi sa mga awtoridad.
Mga dinakpan mao ang gitumbok nga nanulis sa Manollete Bakeshop nga nahimutang sa Cabaluna St. Barangay Gredu, Panabo City alas 12:30 sa kaadlawon niadtong Miyerkules, Enero 29.
Mga suspek giila nga sila PJ Ancog Munez, 18, ulitawo nga taga Negros Oriental, construction worker ug kasamtangang nagpuyo sa Purok 4, Barangay Southern Davao, Panabo; Jeny Tolentino Tero, 26, ulitawo, panday, molupyo sa Purok Alphine, Barangay New Pandan sa maong siyudad; ug si Darwin (apilyedo gitago kay menor), 16, taga Tubod Carmen, Davao del Norte.
Positibong giila ni Armando Tagnaon Boc, guwardiya sa bakery, ilawom sa Trigger First Security Agency, ang mga dinakpan kon diin gitangag sab ang isyu niyang pusil.
Gibutyag nga narekober gikan sa posisyon ni Munez ang kalibre.38 revolver nga kargado og upat ka round sa lima ka mga buhing bala, samurai nga may gitas-on nga 39 pulgadas ug kolor pula ug orange nga Rusi single motorcycle nga adunay plaka nga 1101-0000000666780.
Samtang nakuha sab sa posisyon ni Darwin ang kalibre.38 revolver ug kang Tero mao ang kalibre.38 caliber nga dunay lima ka mga buhing bala.
Base sa imbestigasyon, nagpakaaron nga mopalit og pan sa nahisgutang bakery ang tulo apan kalit mga mideklara’g tulis, dayon kuha sa armas ni Boc kinsa maoy nagbantay niadtong higayona.
Daling mikagiw palayo ang mga suspek sakay sa kolor pula nga motorsiklo nga way plaka ug mipaingon sa Panabo Public Cemetery.
Apan kapulisan sa Panabo City Police Station sa pagpanguna ni Police Major Ernesto Gregore nilusad og hot pursuit operation nga miresulta sa malampusong pagkasikop sa mga nahisgutan. (Dexter T. Visitacion)