DAVAO DEL SUR -- Nahutdan na og surgical ug N95 face masks ang daghang mga botika sa kalungsuran sa probinsiya sukad pa niadtong Lunes, Enero 27.
Daghan sa mga molupyo ang nag-“panic-buying” sa face masks sa kabalaka nga mataptan sa 2019 novel coronavirus (2019-nCov).
Sa Bansalan, nahurot na ang face masks sa mga botika hinungdan naminghoy si alyas Lynlyn, 23, dihang misuway siya og palit, Biyernes sa buntag.
Naabtan sab sa SunStar Superbalita si Lydia Jasmin, 45, nga gibalibaran sa usa ka tindera sa botika sa iyang pagpalit og face mask kay matud pa niadto pang miaging semana nahurot ang ilang baligya.
Sumala sa tag-iya sa usa ka drug store nga si Bebeng, nahutdan na sila og face mask human daghan ang nagbulto-bulto sa pagpamalit.
Sa dakbayan sa Digos, gikompirma ni Esther, 37, nga nakapalit siya og 100 ka face masks sa miaging semana kay iya kining gipadala sa iyang mga ig-agaw nga atua sa nasud Hong Kong ug Japan.
Bisan ang mga nagpuyo sa kabukiran miapil na og kabalaka bisan og wa makasabot kon unsang matang sa sakit ang 2019-nCoV.
Giangkon ni Elena Gascon, 52, molupyo sa Barangay Kapatagan ning dakbayan nga iya lamang nasayran nga makamatay ang sakit mao nga nangita sab siya og face mask.
Misamot kaalarma ang katawhan human nadunggan sa balita ang kompirmasyon sa Department of Health (DOH) nga adunay usa nga nag-positibo sa nCoV dinhi sa nasud.
Ang uban naapil kaalarma human giingong nakalusot sa Davao Airport ang 79 ka mga Chinese nationals nga ania na sa rehiyon.
Sa pagsuwat ning balita, wa pay gipaguwang abiso ang mga lokal nga gobyerno sa probinsiya aron kapugngan ang pagpanic sa publiko.
Si Presidente Rodrigo Duterte Biyernes, Enero 31, nagmando na sa pag-ban sa tanang biyahe gikan sa Chinese Province nga Hubei, ang epicenter sa bag-ong coronavirus outbreak.
Ang ban gilugwayan sa uban pang mga lugar nga dunay gikompirma nga kaso sa sakit, ug molungtad hangtud nga ang hulga niini matapos, sumala ni Presidential Spokesman Salvador Panelo.
Gitagad sa Presidente ang rekomendasyon ni Health Secretary Francisco Duque III bahin sa travel ban human ang Pilipinas niadtong Huwebes, Enero 30, nagkompirma sa unang kaso niini sa usa ka babayeng turista gikan sa Chinese City sa Wuhan.
Samtang ang World Health Organization nagdeklara sab sa outbreak nga global emergency human niratsada na kini og sud sa 18 ka mga nasud sa kalibutan.