MOABOT na sa 30 ka mga motorsiklo ang gi-impound sa City of Talisay Traffic Operations Development Authority (CT-TODA) sukad sa Miyerkules, Enero 29, hangtud sa Huwebes sa udto, Enero 30.
Kini tungod sa paglapas sa city ordinance batok sa mga bora bora kun banha kaayo nga mga tambutso.
Dunay mga tag-iya og motorsiklo nga ganahan og bora-bora kay masusama og tingog sa dagkong motorsiklo samtang dunay uban nga mas gusto niini kay madunggan ang sakyanan samtang nagpadulong ug malikayan ang disgrasya.
Gitug-an ni Jonathan Tumulak, pangulo sa CT-TODA, nga nihingusog sila pagbalik sa operasyon batok sa mga banha kaayo nga tambutso human nakadawat og daghang mga reklamo si Talisay City Mayor Gerald Anthony Gullas.
Ang mga reklamo di lang gikan sa mga Talisaynon, apan lakip na sa mga moagi ug nituyo sa Talisay.
Gisugdan ang operasyon sa Miyerkules alas 8 sa buntag hangtud na sa pagkagabii, ug magpadayon hangtod nga wa nay mabantayan nga naggamit og bora bora.
Gipasabot ni Tumulak, nga base sa ordinansa, i-impound ang motorsiklo.
Makuha lang kini sa tag-iya kon iyang madala ng original nga tambutso ug mobayad sila og P1,000 isip multa.
“Bisan kon makamulta sila, kon dili nila dala ang original nga tambutso o kadtong dili saba nga tambutso, dili gyud nila makuha ang ilang mga na-impound nga tambutso. Ug sa pagkuha nila sa ilang motor, ipabilin o kompiskahon gyud ang bora bora,” asoy ni Tumulak.
Di lang Talisaynon ang punterya sa operasyon, kundi tanang motorsiklo nga masakpang’ naggamit og bora bora nga moagi sa Talisay.