NASUTA na sa Department of Healh (DOH) 7 ang mga lugar nga nabisita ingon man mga hotel nga giistaran sa 38-anyos nga babaye nga unang positibo sa 2019-novel coronavirus (2019-nCoV) sa nasod.
Ang Chinese national kuyog sa iyang uyab nga nilaag sa Dumaguete City.
Giklaro ni DOH 7 Regional Director aime Bernadas nga niagi ra ang duha sa Sugbo tungod sa ilang connecting flight gikan sa Hong Kong paingon sa Dumaguete City, Negros Oriental.
Gikan sa Terminal 2 sa Mactan Cebu International Airport (MCIA), niadto sila sa Terminal 1 alang sa connecting flight.
Wa pa gibutyag ni Bernadas kon pila ka hotel, resorts ug indibidwal ang ilang gimonitor karon.
Matod ni Bernadas nga nihangyo ang hotels ug resorts nga dili hinganlan aron usab di bati ang ilang dungog sa publiko.
Sa pagkakaron, aduna na’y mga na-identify ang epidemiology team nga anaa sa dapit sa mga tawo nga nahimamat sa Chinese national.
Si Regional Epidemiology Surveillance Unit (RESU) 7 head Shelbay Blanco mao ang nangulo sa team gikan sa DOH 7 samtang naabot na usab ang team gikan sa Central Office nga motabang sa contact tracing.
Aduna’y tulo ka epidemiology team ang anaa karon sa Dumaguete City aron motabang sa contact tracing.
Kon masuta na nila ang ilhanan sa mga tawo o indibidwal nga nahimamat sa Chinese national, kuhaan kini nila og detalye ingon man kon naay sintomas sa virus, ila kining i-quarantine.
PUI
Samtang sa labing uwahi nga datus sa DOH 7 anaa sa upat ang patient under investigation (PUI) nga anaa sa Sugbo.
Tulo niini ang lalake samtang usa ang babaye.
Aduna’y 1-year old nga batang lalake ang lakip sa PUI sa Sugbo, usa ang 19-anyos, usa ang 36-anyos ug dunay 24-anyos nga babaye.
Gihuwat pa ang resulta sa laboratory tests sa upat. Ang upat puros gikan sa China apan dili tanan gikan sa Wuhan.
Ayaw pag-mask
Samtang giklaro ni Bernadas nga kon anaa ra sa naandan nga gimbuhaton matag adlaw, di ra kinahanglan mag-mask.
“We are not recommending the use of mask. Kung kailangan kang mag travel, then maybe that’s the time you will need one. And if you want to go places you don’t know where you’re going to or you don’t know the people, pwede siguro mag mask. But if you are in your daily routine and daily course, you don’t need one,” matod ni Bernadas.
Dugang ni Bernadas nga kon aduna’y sakit susama sa ubo, sip-on o aduna’y problema, pag-mask para di makatakod og sakit.
Magamit ra ang usa ka surgical mask sulod sa walo ka oras ug kinahanglan nga ang blue mao ang anaa sa gawas aron makaprotehir sa panglawas.
Sud ra sab sa walo ka oras nga epektibong magamit ang mask.