MINNESOTA, USA - Dako ang pagtuo ni Joshua Clottey nga maglisod gayud si Floyd Mayweather Jr. batok ni Manny Pacquiao ug kon madayon man gyud ang ilang showdown karong tuiga o ba kaha sa sunod tuig.

Si Clottey kinsa nakasugakod ngadto sa 12 ka rounds bisan pa sa mga pagkulata ni seven-time world champion Pacquiao, miasoy nga kini dakong hagit sa boxing career ni Mayweather batok sa walhon nga taga General Santos City.

Click here for Election 2010 updates

“It’s going to be a very, very tough fight for Mayweather,” padayag ni Clottey.

Ang wa madayon nga negosasyon nga Pacquiao-Mayweather showdown maoy nakapaaghat ni Bob Arum sa Top Rank sa pagkuha ni Clottey aron maoy moaway ni Pacquiao.

Karong Mayo 1, si Mayweather mosakbang ni Sugar Shane Mosley alang sa World Boxing Association (WBA) welterweight title.

Samtang sa laing bahin, gipasalig karon ni kanhi three-division world champion Erik “El Terrible” Morales (48-6, 34 KOs) nga iyang pakamangon ang Nicaraguan KO artist nga si Jose “Jicaras” Alfaro (23-5, 20 KOs) karong Marso 27, sa ilang 12 around main event alang sa WBC Intercontinental welterweight belt didto sa Monterrye, Nuevo Leon, Mexico.

Kini aron mahatagan og kahigayonan nga iyang maaway og balik si WBO Welterweight ug pound-for-pound king Manny “Pacman” Pacquiao.

Si Morales nga nahinabi sa mga media sa Mexico walay duhaduha nga mipadayag nga gusto pa siyang mosangka sa ikaupat nga higayon sa Pambansang Kamao. Sa niagi nilang tulo ka away, si Pacquiao mipukan kaniya og kaduha.

Tinguha ni Morales nga mamahimong unang Mexicanong makasakmit og upat ka titulo sa managlahing timbang.

”Defeating Pacquaio is my greatest accomplishment in the ring. I remember seeing him cry after our fight. I would love another chance at Pacquaio. I’m faster than ever and freer with my body so I can get the most out of it.” saysay ni Morales.

Mga boxing aficionados ug analysts sa Amerika nga gikuhaan sa mga panahom sa Sun.Star Superbalita ug dyRF Radyo Fuerza 1215khz miingon nga sinasina nalang ang gihimo karon sa 34 anyos nga Mexican ug wala nay ikabuga pa batok sa taga GenSan.

Hinuon may misugyot nga kon gusto moaway si Morales mahimong iyang kontrahon sila si Ricky Hatton, Juan Manuel Marquez, David Diaz, Juan Diaz ug ubang mga nilaya na nga mga sikat nga boxers kaniadto. (Daniel Quindao Guden-correspondent)