Corteza milangkat ikaduhang pwesto sa Derby City 10-Ball Challenge

ANG veteran internationalist Lee Vann “The Slayer” Corteza sa Davao City milangkat og runner-up honors sa Derby City Classic Big Foot 10-Ball Challenge nga gihimo sa Caesars Southern Indiana Casino and Hotel sa Southern Indiana, USA.

Ang 40-anyos nga si Corteza, gikan sa Mintal, miyukbo kang World No. 7 Jayson Shaw sa Great Britain, 5-11, sa ilang championship match.

Si Corteza, nga karon nakabase na’s Metro Manila, naunang mipildi ni James Aranas, 11-7, una nakuha ang 11-9 upset victory kontra World No. 2 Joshua Filler sa Germany.

Sa semifinals, ang Dabawenyo nakalingkawas kang World No. 8 Filipino-Canadian Alex Pagulayan, 11-10, aron maplastar ang titular showdown tali Shaw nga nakasugakod sab sa 11-10 thriller kontra Filipino Francisco “Django” Bustamante.

Gipildi sab ni Shaw sila Skyler Woodward (11-3) ug John Morra (11-8) una gibugno si Bustamante.

Sa iyang Facebook post, ang kapikas ni Corteza nga si Gelia sa Panabo City nagpost, “Congrats on your runner-up win Lee Vann Corteza! We are very proud of you! We love you.”

Ang kampeyon nga si Shaw midawat og $16,000 samtang si Corteza mibulsa og runner-up prize sa US $8,000.

Si Corteza, nga nangharus og medalya sa Southeast Asian Games alang Pilipinas sa nanglabay’ng katuigan mao sab ang 2018 Japan Open champion, bottleneck.net 77th World 14.1 Tournament titlist human gipildi ang four-time champion Thorsten Hohmann sa Germany, 2017 US Open Straightpool Championship champion, ug 2013 888.com World Cup of Pool champion uban ang higalang si Dennis Orcollo sa Bislig, Surigao del Sur.