Saludo Kami: Musika ug impluwensiya

DAVAO. Si Jeremy Sarmiento sud sa technical booth sa iyang recording studio sa Damosa, Lanang, Davao City. Roberto A. Gumba Jr.
DAVAO. Si Jeremy Sarmiento sud sa technical booth sa iyang recording studio sa Damosa, Lanang, Davao City. Roberto A. Gumba Jr.

SUD sa usa ka technical booth sa iyang recording studio, makita nimo si Jeremy Sarmiento nga maglingkod tupad sa console.

“Maulaw man ko oy. (I am shy),” ni Sarmiento, nga usa sa ma-implwensiya nga personalidad sa Davao City kung hisgutan ang musika ug entertainment sud na sa 19 ka tuig.

Ang ‘self-confessed introvert music artist’ ug voice coach padayon nga nagprodyus og mga world-class performers nga nakahatag og dugang dungog sa music scene sa siyudad.

Si Sarmiento ang nagpaluyo sa mga kampeyon gikan sa Davao nga mibansiwag sa prestihiyosong World Championships of Performing Arts (Wcopa) gikan 2014 hangtud kasamtangan.

Sagad sa mga kanta nga iyang gisuwat ug gimugna nanghakot og pasidungog.

Siya sab ang WCOPA regional director.

Mga kanta nga iyang gimugna mao ang “Di Matitinag” nga mihatag kang Jed Madela sa pag-ila nga Male Recording Artists of the Year atol sa 11th Philippine Movie Press Club (PMPC) Star Awards for Music karon nga tuig.

Susamang award nakuha ni Madela niadtong 2019 sa mao sab nga awit.

Ang kanhi banker nagkanayon nga bata pa siya anaa na ang musika nga nagdagayday sa iyang dugo.

Niya, naimpluwensiyahan siya sa iyang inahan nga mahiligon sa pagkanta.

“Grade school pa lang ko mapansin nako nga wala kaayo ko gipugos sa academics sa akong mama kay ganahan man mukanta akong mama ba. Ako iyahang pet sa music.”

Dugang niya, “‘Tong elementary, naga-play man kog bandurria. Siguro na-test nila nga maka-play ko’g usa ka music nga paminawon lang. Nakuratan sila nganong nakuha dayon nako. Abi nakog okay lang na siya pero it is something gift daw na siya so ginabanatan dayon ko sa akong mama. Ginapakanta-kanta na ko.”

Niya pa, ginakantahan niya ang mga higala sa iyang inahan nga usahay mohatag kaniya og pahalipay. Hangtud nga nadala niya kini sa high school ug kolehiyo.

Ang management accounting degree graduate nagsilbi nga choir conductor sa Ateneo De Davao University (Addu) atol sa iyang pag-istar sa unibersidad, ug hangtud karon.

Sa edad nga 22, nagagiya na siya og estudyante sa usa ka music school sa J.P. Laurel Avenue hangtud gikuha siyang hurado sa Star of Davao, ang dakong singing competition sa siyudad, niadtong 2004.

Gikonsidera niya kining ‘first break.’ Hangtud gihangyo siyang mohimo og workshops ug nahimong instrumento sa pagmugna og mga music artists gikan sa dakbayan nga midaug sa Wcopa ug national singing competition.

Ang Voice Kids 2017 grand winner ug 2015 Wcopa multi-gold medalist Jona Soquite nagbansay sa music school nga gipanag-iyahan ni Sarmiento.

Apan ning kalampusan sa iyang mga estudyante, buot niyang mausab ang naandan nga ang artists sa Mindanao angay moapil og national contests aron lang mailhan.

“Gusto nako mailhan ang mga maayo nga artists diri. If kaya namo buhaton nga dili magpadala og artists sa Manila, ma-discover lang sila diri unya dalahon sa Manila mag-perform, that would be a lot better.”

Niya, nahimo kining posible sa kaso sa Zhalia, ang trio nga gilangkuban nila Julia Serad, Jetz Tacsanan, ug Shaira Opsimar.

Ang grupo gidapit ng mag-perform sa Cebu human misikat ang awit nilang “Pagsure Uy!”

“Maghimo lang ta’g mga nindot nga songs kay somehow, ang songs will catapult you sa kung asa gusto nimo muadto. If voice lang or singing, mura’g daghan na man gyud hawd sa Pilipinas mukanta, lisod kaayo makipagsiksikan,” niya.

“But if you have a beautiful song nga maganahan ang tanan (that people will love), automatic ka mailhan (they will remember you).”

Si Sarmiento, uban ang lain pang Mindanao music artists, milusad sa Mindanao Pop Music Festival, usa ka songwriting competition alang Mindanao music artists, gikan Enero 31 ngadto Pebrero 2, 2, 2020.

Niya dako kining hagit tungod ang mga Dabawenyos suma pa lisud tandugon ang dughan pag-abot sa lokal nga musika.

“Akong gusto sa audience sa Davao nga makatuon gyud unta mu-appreciate, makatuon gyud mupalakpak. Kinahanglan gyud naay buhaton parang mahimo gyung active ang mga tao. “I think muabot gyud siya in the future.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph