Legario: Ang kinabuhi ni Kobe

NAKALITAN ang tibuok kalibutan sa sports sa pagkadisgrasya ni Kobe Bryant nga maoy nagputol sa iyahang kinabuhi. Sa iyang edad nga kwarenta y uno, bata pa kaayo siya nga nawad-an og kinabuhi.

Kining hitabo nakahatud kanako sa pagpamalandong nga ang kinabuhi usa ka mahuyang nga butang. Bisag unsa nimong amping intawon niini, dili nimo masayran kung kanus-a kini maputol ug mawala.

Atong ginaatiman ang atong lawas aron dili ta sayo mamatay. Atong ginapili ang mga luwas nga lugar nga atong adtuan, ug naga-amping kita sa pagmaneho sa atong mga sakyanan aron maluwas sa disgrasya.

Si Kobe usa ka sportsman nga anaa kanunay sa hingpit nga panglawas. Naga-amping sa iyang kinabuhi, ug nagpalit og helicopter aron mahilayo sa disgrasya sa iyang matag-adlaw nga byahe. Ug sa wala damha, nadisgrasya ang helicopter nga mao’y hinungdan sa iyang kamatayon, kauban ang iyang 13-anyos nga dalagita.

Sa iyang kamatayon, gina-asoy sa katawhan ang iyang kinabuhi sukad pa sa iyang paghimugso sa kinabuhi ug sa iyang pagkamaayo sa basketbolista. Mabasa nimo sa mga newspapers ug sa social media ang pagbayaw sa iyang mga fans sa iyang mga nakab-ot sa kinabuhi.

Apan, aduna pu’y mga nagapabalik sa kamatuoran sa iyang pagkatawhanon- pagka-immature kaniadtong nagasugod pa siya sa basketball, pagkahakog sa bola, isyu sa babaye nga iya kunuhay nga gipwersa, ug uban pa.

Kini nagapasabot kanato nga ang kinabuhi usa ka ampinganan nga butang. Bisan pa sa imong pagkamaayo ug pagkasikat, mouban lang gihapon ang mga dautan nga nalakra sa atong kinabuhi. Dili gayud kini matangtang sa hunahuna sa katawhan, labi na sa mga tawo nga sayop lang nimo ang ilang gina sag-ulo.

Kita nagapasalamat nga bisan pa sa mga kakulangon ni Kobe, si Vanessa nga iyang asawa nagdawat kaniya ug nagpasaylo. Ang ilang malipayon nga panimalay kauban ang ilang upat ka mga anak nagsulti kanato sa naghamtong nga Kobe. Ang gugma, pagsabot, pagdawat ug pagpasaylo mao’y mga pamaagi nga ma-utro ang kinabuhi sa tawo nga kinahanglan og pag-usab.

Kining mga butang nga makautro sa usa ka tawo mao’y bidlisiw sa paglaum nga atong matagamtaman gikan sa atong pamilya, higala ug mga igsuon sa Iglesya. Mao sad kini ang atong mahatag ngadto sa uban.

Busa ako nagapadasig kanato nga atong hatagan og inspirasyon ang uban sa pag-utro sa ilang mga kinaiya, ug ato pud himuon nga inspirasyon ang ilang pagkamaayo kanato. Aron nga sa dili pa pud ta magpahulay sa kinabuhi, mautro sab natong tanan ang atong dapat iutro nga mga pamatasan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph