SUGDAN sa San Miguel Beermen ang ilang tinguha nga malangkat ang ikaunom nilang sunodsunod nga titulo sa Philippine Cup pinaagi sa pagpakigbatok sa Magnolia Ang Pambansang Manok Hotshots inig sugod sa 45th season sa Philippine Basketball Association (PBA) karong Marso 1 sa Smart Araneta Coliseum.
Gipahibalo ni Commissioner Willie Marcial ang eskedyul sa unang adlaw sa bag-ong season niadtong Biyernes sa gabii pagtiklop sa tinuig nga planning session sa PBA Board sa Milan, Italy.
Ang nag-inusarang duwa mao ang panagparang og balik sa duha ka teams nga nag-abot sa Philippine Cup finals sa miaging tuig.
Ang Beermen ningbangon gikan sa 17 puntos nga pagkalubong aron lupigon ang Hotshots sa deciding Game 7 sa finals series ug langkaton ang ikalima nilang sunodsunod nga kampiyunato sa Philippine Cup nga gitawag sab og All-Filipino Conference.
Ning komperensyaha, tanang teams determinadong moilog sa titulo sa Beermen. / ESL