DAKO ang pagtuo sa mga imbestigador nga padung magbawas sa hugaw ang babayeng napalgang patay kinsa gilamayan karon sa mga kabanay sa Barangay San Miguel sa San Isidro, Davao del Norte.
Ang biktima nga ginganlan og Lelina Luardo, 51, napalgang wa nay kinabuhing nagbuy-od sa sagbutong bahin sa bung-aw sa Purok 2, Barangay Linao sa maong lungsod alas 2 sa hapon.
Sumala pa nga sa wala pa ang hitabo, nakita ang biktima ni Joseph Abordo, barangay tanod, nga hubog ug naglakaw padulong sa iyang balay.
Sa gihimong paghiling ni Dr. Jose Michael Segumpan sa patay’ng lawas sa biktima, nasuta nga nakahiagom siya og “rib fracture” sa walang bahin sa kilid sa lawas ug “blunt trauma probably secondary to fall”.
Giawhag ang pamilya sa biktima nga ipailawom sa otopsiya ang patay’ng lawas niini aron masuta ang matuod nga hinungdan sa kamatayon apan ang pamilya mibalibad na.
Sa gihimong pakighinabi sa Superbalita kang Police Corporal Carolyn Pacana, imbestigador sa San Isidro Municipal Police Station, nagbutyag nga posible nga ang biktima nitubag sa tawag sa panginahanglan sa lawas ug wa na mapugngi nga sa ilang balay mobawas og hugaw, hinungdan nga midagan ang biktima sa kalibonan.
Apan gumikan sa giingong kahubog niini, aksidenteng nahagbong sa bung-aw kay sa pagsusi sa patay’ng lawas sa biktima, nanimahong hugaw ang sampot niini nga baho sab sa giinom nga tuba.
Way nakit-ang foul play sa kamatayon sa biktima kon diin ang patay nga lawas niini gipahiluna sa Topaz Funeral Homes.