DUHA ka mga tindahan ang imbestigahon sa Department of Trade and Industry (DTI) tungod sa mga reklamong nagpa-overprice sa ilang baligyang mga face mask nga giingong nilapas sa suggested retail price (SRP).
Gawas sa duha ka mga tindahan, dunay laing tulo nga ilang padad-an og letter of inquiry.
Ang SRP sa surgical masks tag P1.10 ngadto sa P8 samtang sa N95 mask P45 ngadto sa P105 matag usa. Wa nila nganli ang mga tindahan.
Ang DTI nag-monitor sa pagbaligya sa mga face mask sa mga tindahan sa Dakbayan sa Sugbo human sa mga reklamo sa overpricing.
Base sa ilang monitoring, nasayran sa trade department nga gibaligya ang disposable face masks gikan sa P2-P10 samtang ang N95 gikan sa P95-P200, labaw kaayo sa SRP.
Sa usa ka advisory sa Sabado, Pebrero 1, 2020, ang DTI Cebu provincial office niingon nga labing minos 10 ka mga establisemento ang ilang gi-monitor sa Enero 31, 2020 taliwa sa pagsaka sa panginahanglan sa face masks tungod sa kahadlok sa 2019-novel coronavirus acute respiratory disease ((2019-nCoV ARD).
Ilang gipahigayon ang monitoring “after numerous complaints from consumers on overpricing of the said items.”
Tulo usab ka online sellers ang gikatahong namaligya sa face masks nga sobra sa SRP.
“These online sellers selling disposable face masks over the SRP P8 are now recorded and will be traced with the help of the National Bureau of Investigation,” matod sa DTI Cebu.
Matod ni DTI 7 Director Asteria Caberte nga sila ni-request og daghang masks sa mga pharmacy sa rehiyon aron pagtubag sa kakuwang, apan ang SouthStar Pharmacy, Mercury Drug ug Watsons ningsanong sa ilang request.
Kadtong mag-overprice makamulta og labing dako P300,000.
Mga complainant giawhag sa pag-e-mail sa kopya sa official receipt, invoice o delivery receipt nga dunay kompletong address sa seller ngadto sa ro7.cebu@dti.gov.ph.
LAPU-LAPU
Giawhag karon ni Lapu-Lapu City Mayor Junard “Ahong” Chan ang publiko partikular na mga Oponganon sa pagtaho sa iyang buhatan kalabot sa pagpalabi unya sa mga pharmacy o tindahan sa ilang presyo sa face mask.
Kini human nga nakadungog ang mayor og mga taho nga adunay nagpahimulos sa higayon nunot niining grabeng demand karon sa katawhan sa face mask.
Matod ni Chan nga kon ugaling makadawat siya og reklamo kalabot niini. siya mismo ang mopasaka og kaso batok sa pharmacy o tindahan.
Gawas niini, iya pang pahamtangan ug silot sama sa pag hold sa business permit.
Kon ugaling naisyuhan na kini, hayan ipa revoke usab kini sa mayor. Dili gusto ang mayor nga adunay mopahimulos sa higayon niining panahon nga nagkinahanglan ang kadaghanan sa face mask.
Si Cebu City Mayor Edgardo Labella nibahad usab nga iyang tangtangan sa business permit ang magpa-overprice. / CHL, GCM