Dear Papa Joe,
Ako diay si Mercy, 24 years old, trabahante sa factory diri sa Danao. Usa ako ka single mom kay gibiyaan ko sa akong pares dihang nagmabdos ko kay naa diay siyay pamilya sa Manila.
Upat ka tuig ang nilabay, naila-ila nako si Fred. Buotan man siya ug dihadiha ako siyang giingnan nga may anak ko ug matod niya nadawat ko niya. Milabay ang duha ka tuig, ni-decide mi nga mag- ipon. Apan ang problema di siya gusto iuban akong anak ug kami lang daw sa umaabot namong anak kay wa kahibawo iyang pamilya na angkan ko. Unsa may angay buhaton nako? Palihug tambagi ko.
MERCY
Mercy,
Lisod gyud na kay wa na sad gyud nimo ilha ang lalake. Samot na siguro og mabdos naka ron.
Pasabta siya nga kon nadawat ka niya, dawaton niya imong anak kay wa man nay labot. Ingna sahi gud og siya ang bata unya ibilin siya sa iyang mama, malipay kaha siya? Kay kon sundon na nimo imong gitawag nga gugma, basin di ka makatulog maghayang maghunahuna sa imong anak sa una.
Siguro kon di gyud para imo, ayaw ipugos ug ampo sa Ginuo nga makaplagan nimo si Mister Right.
PAPA JOE
(sa inyong tampo ipadala sa papajoesuperb@gmail.com)