WALA gisipyat sa mga sumosunod ni Kobe Bryant dinhi sa Sugbo ang pagmata og sayo kagahapon aron makasalmot sa Run For Kobe nga nanukad ug nahuman ra sab sa Cebu City Sports Center.
Alang sa mga sumosunod sa National Basketball Association (NBA), ilaha kining tribute ngadto sa ilang idolo nga nipanaw kauban ang iyang anak nga si Gianna ug laing pito ka mga tawo gumikan sa helicopter crash.
Nagkatapok sa tribute run ang nagkadaiyang mga sumosunod ni Bryant -- adunay mga bata, adunay elite runners, fitness enthusiasts, weekend warriors ug uban pa.
Nanagan ang mga partisipante sa tulo ka mga kategoriya nga mao ang 24-kilometer, 8K ug 2K.
Ang 24K ug 8K nagrepresentar sa mga numero nga gipanggamit ni Bryant dihang nagduwa kini sa NBA sulod sa 20 ka mga tuig samtang ang 2K nagrepresentar sa numero nga gigamit ni Gianna, kinsa usa sab ka basketbolista.
Ang triathlete ug runner nga si Jezrel Baguio usa sa mga sumosunod ni Bryant nga nisalmot sa lumba.
Sa interbyu sa Sun.Star Cebu, gipasabot ni Baguio nga nagsunod na siya kang Bryant niadto pang high school pa siya ug nahimo siyang sumosunod sa Lakers gumikan kay Bryant.
Gitataw ni Baguio nga nakadayeg siya’g maayo kang Bryant hilabi na dihang naghatag kini og pinansyal nga donasyon sa mga nangabiktima sa bagyong Yolanda nga ninghaguros sa Pilipinas kaniadto.
Nisalmot sab sa lumba ang kanhi Cebu Marathon women’s 42K champion Preciousa Sanchez, kinsa usa sab ka sumosunod ni Bryant.
Niapil sab sa lumba ang sportswriter nga si Edri Aznar bisan dili kini sumosunod ni Bryant. Si Aznar usa ka diehard fan sa Dallas Mavericks sukad pa kaniadto.
“I was never a Kobe fan. However, my perspective of Kobe changed late in his career and when he retired. Kobe was a global icon. He’s a huge loss to the basketball world, especially with his advocacy to women’s basketball." (RSC, ESL)