GIANGKON sa Los Angeles Lakers nga dili gihapon normal ang ilang gibati gumikan sa kamatayon ni basketball legend Kobe Bryant apan ilang gipakita nga masugakod nila ang ilang pagbangutan pinaagi sa pagbuntog sa hosts Sacramento Kings, 129-113, kagahapon sa National Basketball Association (NBA).
Gipangulohan ni Davis Anthony ang Lakers pinaagi sa iyang 21 puntos samtang si LeBron James, bisa’g dili kini maayong nakaduwa, nakatampo gihapon og triple-double nga 15 puntos, 11 assists ug 10 rebounds.
“It’s never going to feel normal. It’s never going to feel the same,” asoy ni Lakers coach Frank Vogel. “But we got our first win since this happened. There’s going to be a lot of important steps for us along the way and this was definitely one.”
Mao kini ang ikaduhang higayon nga ningduwa ang Lakers gikan sa kamatayon ni Bryant, kinsa usa sa siyam ka mga tawo nga naglakip sa iyang anak nga si Gianna sa nakabsan og kinabuhi gumikan sa helicopter crash.
Sa premirong duwa sa Lakers gikan sa insidente, nasugamak sila sa emosyunal nga kapildihan batok sa Portland Trail Blazers, 119-127, sulod mismo sa ilang tugkaran.
Atol sa premirong timeout tali sa kombati sa Lakers ug Kings, gisalida ang video sa higanteng scoreboard diin nakita sila si Bryant ug Gianna nga nagduwa og basketball.
Misiga ang mga numero nga 8 ug 24 sa korte dungan sa paglanog sa tingog ni Bryant sulod sa venue.
Sa pagpadayon sa duwa, padayon ang tribute ngadto kang Bryant. Daghan sa mga tumatan-aw ang nagsul-ob og jersey ni Bryant ug balikbalik nga pagsinggit sa pangalan sa usa sa labing maayong mga magduduwa sa kasaysayan sa NBA.
“We’re prepared for it. We understand it and we hope it happens every night just because of the legacy that he’s left behind,” matod ni James.
“We’re prepared for it as a team, as an organization and we’re going to continue to get through it. It’s our obligation just to go out and play the game, have that winning mentality because that’s what he would want.”
Ang Lakers sayo nga nakapainit sa ilang opensa ug nakaposte dayon kini’g dakong labaw, 44-22, sa halftime.
Human niini, kontrolado na sa Lakers ang engkuwentro ug wala na nakapanghudlat ang Kings hangtod na sa katapusang gutlo.
“Tonight, it was get back on track,” dugang ni Vogel. “Let’s get back to business and go out and get a win, no matter what.”
Ang Lakers ningsaka sa 37-11 nga rekord nga nagpahugot sa ilang paggunit sa liderato sa Western Conference samtang ang Kings natagak sa 18-31 nga baraha, ika-13 sa West. (AP, ESL)