MOABOT sa 118 ka mga tawo ang nangasikop sa tibuok buwan lang sa Enero sa siyudad sa Talisay, tungod sa pagkalambigit sa gidili nga drugas, diin mobalor tanan sa dul-an P8.9 milyones ang balor sa nangasakmit.

Usa na niini ang pagkasikop sa Obrero family nga giisip nga dakung pamilya nga mamaligyaay og drugas sa dakbayan.

Gitug-an ni Police Major Gerard Ace Pelare, hepe sa Talisay City Police Station, nga ang gidaghanon sa mga nadakpan tungod sa subsob nila nga mga operasyon.

Ug sa tabang sa komunidad sa pag-report sa mga molupyo nga nalambigit sa ginadili nga drugas, sukad pa sa pagsugod gyud sa buwan.

Mas nipahugot pa ang TCPS sa ilang gipatuman nga operasyon batok sa drugas pinaagi sa pagpatuman sa static 24/7 checkpoint ug pag-lockdown sa Barangay San Roque ug Barangay Tanke.

Kini human sa pagpahinumdom ni Presidente Rodrigo Duterte, atol sa Sinulog, batok sa mga nalambigit sa ilegal nga drugas sa Sugbo ilabi na sa Talisay City.

Ang Police Regional Office 7 ang nidugang sa pwersa sa TCPS, pinaagi sa 30 ka mga pulis nga gikan Regional Mobile Force Batallion (RMFB-7).

Tungod sa static checkpoint uban na ang kanunay nga pagpatrolya ug ang mga gihimo nga buy bust, nabantayan sa kapulisan nga aduna gyud pag-minus sa supply ug sa mga manggamitay sa ilegal nga drugas dili lang sa Tanke ug San Roque, apan sa tibuok Talisay City.

Ug aron sa pagpalig-on aron hingpit na gyud dili na makabalik pa ang mga ilegalista, Dominggo sa buntag hangtud sa alas 12 sa udto, Pebrero 2, nihimo ang mga pulis ug pagbisita sa mga balay diha sa Tanke.

Pinangulohan ni Pelare, niabot sa 30 ka mga balay ang nabisita ug 136 ka mga molupyo ang ilang nahinabi ug napasabot sa dautang epekto gyud sa ilegal nga drugas, ug kon ngano gibuhat nila ang nagkadaiya nga programa pagbatok niini diha sa ilang barangay.

Usa ka boodle fight sa kapulisan sa Talisay uban sa mga barangay opisyal sa barangay Tanke ang nagtapos sa ilang kalihukan. (B)