LABING unang namatay sa 2019 novel Coronavirus (nCoV) gawas sa nasod sa China, nia natala sa Pilipinas human gikompirmar sa World Health Organization (WHO) ug sa Department of Health (DOH) ang kamatayon sa 44 anyos nga Chinese national nga uyab niadtong 38 anyos nga babaye nga labing unang kaso sa 2019-nCoV sa nasod.
Samtang si Presidente Rodrigo Duterte, opisyal nang ni-ban sa pagsulod sa nasod sa bisan unsa nga nationality basta gikan o nakaagi sa nasod sa China ug mga Special Administrative Region (SAR) niini nga Hong Kong ug Macau.
Ang 44 anyos nga lalake nga Chinese national, mao ang ikaduhang kompirmado nga kaso sa 2019-nCoV sa nasod ug matod sa DOH, nakabsan kini sa iyang kinabuhi niadtong Pebrero 1, Sabado.
Nakabsan siya sa iyang kinabuhi sa San Lazaro Hospital sa Sta. Cruz, Manila.
Pulos gikan sa Wuhan, China ang duha diin naabot kini sa Pilipinas niadtong Enero 21, gikan sa Hong Kong.
Na-admit ang maong ikaduhang kompirmado nga kaso sa 2019 nCoV niadtong Enero 25 human kini makit-i og sintomas sa pneumonia susama sa hilanat, ubo, ug pagpanakit sa tuntonlan.
Nakalaag pa kini sa Dumaguete City, Negros Oriental sa wala pa kini ma-quarantine sa kaulohan.
Gikataho nga nakaagi kini sa Sugbo apan kutob lang sa Mactan Cebu International Airport (MCIA).
“I would like to emphasize that this is an imported case with no evidence of local transmission. We are currently working with the Chinese Embassy to ensure the dignified management of the remains according to national and international standards to contain the disease,” matod ni Health Secretary Francisco Duque III.
Sa pagkakaron, padayon ang gihimo sa Epidemiology Bureau (EB) sa DOH sa contract tracing sa duha ka Chinese nationals nga nakauban niini sa flight dihang nibiyahe kini gikan sa Wuhan, China paingon sa Hong Kong direkta sa Cebu paingon sa Dumaguete.
Usa usab sa gi-contact tracing karon ang mga dapit nga nabisita sa duha lakip na ang nahimamat niini.
Samtang, gipahibawo usab sa DOH Manila nga adunay 36 ka patients under investigation (PUIs) apan ang 30 niini gideklarar nga negatibo na sa 2019-nCoV ug ang 10 niini gi-discharge na sa ospital.
Apan laing upat ang gihuwat ang resulta.
Sa pagkakaron, duha ang kompirmadong dunay 2019-nCoV apan ang usa niini namatay kagahapon, Pebrero 2.
“Temporarily banning the entry of any person, regardless of nationality, except Filipino citizens and holders of Permanent resident visa issued by the Philippine Government, who within fourteen (14) days immediately preceding arrival in the Philippines, has been to China and its Special Administrative Regions,” direktiba ni Duterte pinaagi ni Executive Secretary Salvador Medialdea.
Kini nagpasabot nga kadto rang Pinoy nga aduna’y Permanent Resident Visa ang makasulod sa nasod apan ipaubos pa kini sa 14 adlaw nga mandatory quarantine sa dili pa hingpit makasulod sa ilahang destinasyon sa nasod.
Dili na usab mamahimong molarga ang Pinoy paingon sa China, Hong Kong, ug Macau gikan sa nasod subay sa maong ban.
Nasayran nga aduna’y mga direct flight ang Mactan Cebu International Airport sa Sugbo gikan sa China, Hong Kong, ug Macau. (B)