HUGTANONG gipasabot ni Bise Mayor Michael Rama nga nasayop lamang ang mga reporter sa pamantalaang “The Freeman” sa pagamit og termino nga wala malibkas sa iyang baba atol sa iyang duha ka oras nga interview sa mga editor ug kolumnista sa maong news organization. Kay ang iyang napamulong mao man ang kooperasyon ug dili ang kolaburasyon nga nagpasabot na og pagluib ug pangpanglinla.
Niya pa nga ang iyang gipasabot mao man ang dayag nga kondisyunal nga kooperasyon kon ugaling sa dili kalikayan nga mga sirkumstansya ug kahigayunan gikinahanglang makighiusa siya sa Kapitolyo ubos sa landong sa liderato ni Gob. Gwen Garcia alang sa pagtubag sa panginahanglan sa katawhan.
Iya usab nga gitataw nga wala siya mangaway kang bisan kinsa kay dili kini iyang kinaiya ug ang iyang pagsupak sa naunsyaming 93-1 Land Swap deal tali sa Dakbayan ug Probinsya, nagsukad sa iyang nakitang balido nga argumento ug wala kiniy bahid sa personal nga pakig-away.
Sa ilang bahin, ang buhatan sa gobernadora pinaagi sa ilang spokesman Atty. Rory Jon Sepulveda ang nihangop sa baruganan ni Bise Mayor Mike Rama ug nipadayag nga ang Kapitolyo andam sa tanang higayon sa pakig-uli sa kagamhanan sa Dakbayan sa Syudad, ubos unya bag-ong administrasyon. Gani andam usab silang mobanhaw sa Land Swap Deal aron mahingpit dang mahuman kining maong problema nga maka-apektar sa libuan ka mga pamilyang urban poor dinhi ning dakbayan.
Apan si Mayor Tomas Osmeña sa iyang bahin, dili modawat sa palusot nga kooperasyon lang ug dili kolaburasyon. Kay niya pa, kini naghatag og sayop nga impresyon sa katawhan nga si Mike Rama ni-abandonar na sa iyang kauban nga si Jun-Jun Davide kinsa karon nagpapili usab sa pagka-gobernador sa Probinsya sa Sugbo.
Di usab mahimong mopalusot, matod pa, sa tanang higayon si Mike Rama nga wala siya nihimo ug pakig-alkontra sa Kapitolyo kay siya man ang sinugdanan ning panagbangi sa Kapitolyo ug sa Dakbayan.
Ang iyang pagpanghugas na usab sa iyang mga kamot, nagpunay lang siyag lihay sa mga isyo nga nanawagan sa iyang sakto ug piho nga posisyon ug baruganan. Menos duha ka mga buwan sa dili pa ang Mayo 10, dungan sa pag-aslom sa relasyon sa mayor ug sa bise mayor sa Dakbayan, nideklarar si kanhi Sen. Sonny Osmeña nga iyang buhion pagbalik ang iyang kandidatura sa pagkamayor kay siya da ang garantiya ni Tomas nga mo-uli sa dakbayan ngadto kaniya sa paglabay unya sa tulo ka tuig.
Ning maong kahimtang, naghinaot usab si kanhi Mayor Alvin Garcia nga sa hingpit barugan nalang ni Mike Rama ang iyang nakitang ensakto ug di na magpauntoy sa iyang amo. Sa pagligid sa mga adlaw, uban usab unya niining mosibaw kon si kinsa ang manunod sa paglingkod sa giilugang lingkuranan sa pagka-mayor sa Harang Dakbayan sa Habagatang bahin sa Pilipinas.