PADAYON ang pagbangutan sa pamilya, higala, ug tim sa Los Angeles Lakers sa kamatayon ni Kobe Bryant.
Usa si LeBron James nga dulot bukog ang kamingaw sa kamatayon sa giila niyang "brother."
Isip pahinungod sa usa ka higala, si James, 35, mipaburda sa iyang paa isip pahinungod kang Bryant.
Ang tattoo ni James usa ka naglikus nga bitin sa rosas uban ang numero ni Bryanty nga 24 ug 8. Duna say kini suwat nga "Mamba 4 Life."
Gitawag ni Bryant ang kaugalingon nga "Black Mamba" human gikasuhan og sexual assault niadtong 2003, sa tumong nga mabuwag ang iyang karera gikan sa pagbatikos.
Luyo kang James, nagpatattoo sab ang kauban niyang si Anthony Davis.
Ang tattoo ginama sa artist nga si Vanessa Aurelia.
Wa pa gipakita ni Davis ang tibuok detalye sa iyang tattoo apan sa iyang gipost sa social media duna kini pako nga kolor purple nga kolor sa tim.