Bra gihimong face mask giawayan

Bra gihimong face mask giawayan

DAVAO DEL NORTE -- Nahimong dakong away sa magsuong pulos nagtungha sa kolehiyo ang nawala nga bra.

Gihusay sa ilang landlady ang magsuong Kaisa, 18, ug ang manghod nga si Leo, 16, pulos nagtungha sa wala gibutyag nga tunghaan sa siyudad sa Tagum human nakamugna'g kaguliyang sa gipuy-ang boarding house sa maong higayon.

Sa saysay sa usa sa mga ka-boardmate nga nagpatago sa pangalang Liza, 17, estudyante sab, nga nakurat sila dihang nalamba ang sira sa pultahan sa kuwarto nga gi-ukopa sa magsuon ug maoy sunod nga nadungog ang yawyaw sa maguwang nga si Kaisa nga miakusa sa manghod og kawatan.

Matud pa nga nasuko ang maguwang human nawala ang mahalon ug bag-o pang inutang nga bra nga gibutang sulod sa karton, kauban sa uban pang mga sinina nilang magsuon kon diin giakusahan niini nga ang bra gikuha sa manghod nga si Leo.

Nasayran nga gitripan diay ni Leo ug mga barkada ug gihimong kalingawan ang bra ug nagpahulagway ug gi-post sa Facebook nga dunay gitaptap sa nawong kay gihimong face mask nga gibutangan og "# to protect

coronavirus # use bra facemask" agi og proteksiyon matud pa gikahadlokang 2019 novel coronavirus.

Gibutyag nga labihang sukoa sa maguwang, sanglit ang bra inutang pa sa classmate nga nag-negusyo niini ug nasayran nga ang bra wa pa maimpas sanglit gihinay-hinayan lang og bayad gikan sa allowance nga madawat gikan sa ilang ginikanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph