GIDAYEG ni Secretary Roy Cimatu, sa Department of Environment and Natural Resources (DENR), ang siyudad sa Cagayan de Oro human nga nagpatuman kini sa balaod labi na sa Republic Act 9003, o Ecological Solid Waste Management Act of 2000.
Kini human hingpit na nga gisirado ang kanhi dumpsite sa Upper Dagong, Barangay Carmen ug duna nay sanitary landfill nga nahimutang sa Barangay Pagalungan.
Gibutyag ni Cimatu nga gamay pa lang ang nagpatuman niini ug nalipay kini tungod kay usa niini ang dakbayan, gani kaniadto samtang anaa pa sa 4th ID, nasinatian niini ang kabaho sa maong dumpsite kaniadto ug wala kini magdahom nga sa pagbalik isip sekretarya sa DENR dako na ang kabag-ohan.
"Bihira pa yung municipalities. In fact, all over the country, mababa eh. All over the country, 10 to 15 percent lang compliant," dugang pa.
Gikalipay niini ang pag-implementar niini sa dakbayan atol sa pagbisita mismo niini sa kanhi dumpsite ug sa sanitary landfill niadtong Enero 31.
Matud ni Cimatu nalipay siya sa gihimo sa lokal nga kagamhanan sa siyudad sa Cagayan de Oro ubos na usab sa administrasiyon ni Mayor Oscar Moreno.
"I'm very happy na ang proper disposal na implement dito sa Cagayan de Oro," matud ni Cimatu.
Samtang nalipay usab si Moreno sa pagdayeg ni Cimatu, apan giingong dili kini mahimo kung wala ang mga kaabag sa pagpanerbisyo sama sa City Local Environment and Natural Resources Office (Clenro) pinaagi ni Engr. Armen
Cuenca, City Council, kapitan sa Barangay Carmen Lorna Uy, Kongresman Clarex Uy, ug labi na sa national government.
"Nalipay pud ko, pero of course, this would haven't been possible kung wala ang City council, kaabag," matud pa.
Gidugang pa nga dunay suporta ang nasyonal nga kagamhanan alang sa mga open spaces ug gipili ni Moreno ang maong dumpsite.
"I opted to instead nominate this para atong ma convert to Ecopark so naay gipasiuna naay P70 million nga gihatag sa national government through the DBM kita pud nag counterpart pud ta og equal amount para makita pud nila nga dili lang ta 'dawlim'," matud ni Moreno.
Gitakdang pagahimuon og eco park ang 17 ka ektarya nga kanhi basurahan diin duna kini adult play area, forestry area, colorful trees, boat duck, bamboo garden, function hall, wild bamboo trees, food court, water catchment, amphitheater, walkway/bike lane, jogging, children's play area, parking area, fruit garden, butterfly garden, nursery, ug uban pa.