AGUSTO 10, 2019. Mahal kong Erlinda, gisulatan tika kay wa ka man gyud motubag sa akong mga teks ug tawag sa selpon. Usa, duha, tulo ka semana nakong painaabot. Hinuon, gisabot ko ang sitwasyon. Tingali, gidid-an ka sa imong amahan. Labihan man god ang iya kasuko nako pagkahibalo niya sa atong relasyon. Gani, nia pa ang mga pangos ug bun-og sa akong lawas nga nahiaguman ko gikan kaniya. Pero, wa ko kini igsapayan. Ang mahinungdanon nga gi-depensahan mo ang atong gugma. Mibarog ka atubangan sa imong amahan nga gihigugma mo ako, ug kamatayon da ang makabulag natong duha. Misamot pag-ulbo ang kasuko ni papa mo Facundo. Daw hayop akong giabog gikan sa inyong pinuy-anan.

Pero, wa ko basula si Papa nimo. Kabos ako ug kamo adunahan. Drayber lang ko sa inyong pamilya. Nagtuo siya nga gusto lang kong manghantok aron makahaw-as sa kakabos. Apan wala kana sa akong hunahuna. Nasayod ka niini, Lin. Saksi ang mga gabii nga subli-subli tang gilitok ang kamatinud-anon sa duha ta ka gugma. Lamang, wa sabta sa imong Papa ug Mama.

Lin, di ko na lang tas-on kining sulat. Tubaga unya aron akong mahibaloan unsa na karon ang imong kahimtang. Ug usab, aron atong sabutan ang sunod nga angay tang pagabuhaton./ Ang nagmahal, Artemio.

Septiyembre 21, 2019. Lin, kapin sa bulan na akong naghulat sa tubag mo sa akong unang sulat. Apan hangtod karon wa akoy nadawat nga sulat gikan kanimo. Ngano, Mahal ko? Gihigpitan ka ba gayud diay pag-ayo ni Nyor Facundo? Ug hasta sab ni Mama nimo Matilde? Maong wa ka gayud makapadala nako bisan mubo lang nga mensahe?

Lin, mananghid diay ko nimo. Karong sunod semana mopauli una ko sa Davao. Nakadawat kog telegrama gikan sa akong amahan. Kinahanglan nga mopauli ko sa labing madali. Wala isulti ang hinungdan. Pero nabalaka ko kay tigulang na ra ba si Tatay Mateo. Apan sagdi lang, kay kon way dagkong kakulian, mobalik dayon ko dinhi sa Cebu./ Artemio.

Disyembre 20, 2019. Namingawan kong Erlinda, pasayloa nga wa dayon ko makasulat nimo samtang dia ko sa Davao. May mahinungdanong butang nga akong giasikaso. Usa ka butang nga makalipay gayud nimo. Ug tingali, hasta sa imong Papa ug Mama. Lin, milyunaryo na ako karon! Nakabati ka? Milyunaryo na kita! Mao diayng gipapauli ko ni Tatay Mateo kay ang upat ka ektaryang luna sa among yuta nga pansil kaayo ug wa sukad mohatag og maayong produkto, naa diay dakong deposito sa bulawan ang kahiladman niini. Nahalin kini og minilyon ka pesos ngadto sa Japan-Philippines Mining Corp., usa ka dakong kompaniya sa mga negusyanteng mga Hapon ug Pinoy.

Busa, Lin, maglipay kita! Inigbalik ko dinhi sa Cebu, magpakasal na unya tang duha. Magminyo kita! Segurado ko nga dili na mosupak sila si Nyor Facundo ug Nyora Matilde nga magpakasal kita. Mao nga paabuta ako, Mahal ko!/ Ang gimingaw kanimo, Artemio.

HINAY nga gipilo ni Matilde ang sulat human kini niya mabasa. Unya gintunol niya kini ngadto sa iyang bana nga diha maglingkod tupad kaniya.

“Facundo, tubaga unya kanang sulat alang sa atong anak. Sultii si Artemio nga wala na si Erlinda. Wa na makaantos sa kasub-anan. Mipanaw nga nagbalon og tumang kahiubos kanatong iyang ginikanan,” matod ni Matilde nga naghilak.

Miduko si Facundo. Wa makatingog. Unya, sa iyang mga mata nanglugok ang mga lusok sa luha. (Katapusan)