NAHIMUOT ko naghunahuna nga taastaas gyud ang panahon nga nagdebate dinhi sa Sugbo kon unsay sakto nga buhaton isip pagresponde sa hulga nga novel coronavirus.
Karon lang naklaro nga si Presidente Rodrigo Roa Duterte mismo mimando nga dunay temporaryo nga pagdili sa bisan kinsa nga gikan sa Tsina nga makasulod sa Pilipinas.
Kini nahitabo human nakumpirmar nga dunay Insek nga positibo sa maong kagaw. Gani, ang kuyog niini nga lalaki namatay man.
Kon atong hunahunaon, angayan man gyud nga unahon ang kaayohan sa mga Pilipino kay sa mahadlok kita nga mala-in ang mga Insek. Di na man unta kana lalison pa dinhi sa local.
Kon wa kita masiguro kon unsay baruganan sa Malakanyang, ngano man diay og mohulat lang gyud samtang maghimog mga kongretong lakang pananglitan kabahin sa pagsiguro nga duna kitay igong supply sa maskara.
Karong nagmando na si Presidente Duterte, dapat mosunod na ang tanan. Kadtong nangugat nga kutob lang kita sa quarantine o nag-ingon nga angayang ampingan ang atong relasyon sa mga Insek o basin maguba ang atong turismo, mohunong na unta sa ilang pagbatbat sa ilang punto.
Nakadesisyon na ang presidente ug nganong di mosunod labi na kining iyang mga tigsuporta? Bahalag molikoy ang mga punto, basta ang mahinungdanon karon nga panglawas sa mga Pilipino ang unahon ug mao kini ang desisyon ni Presidente Duterte. Hinuon, di kalikayan nga daghang mga maayong laki ug nagkada-iya lang ang mga opinion kabahin niining corona virus.
Mohangyo lang kita sa atong mga kaigsuonan nga dili dayon motuo nya mo-share sa mga binuang nga mga post. Mas maayong mabatasan nato ang mo-fact check. Unya na kita mokomentaryo, if ever, ug mo-share kon nasiguro na kita nga tarong ug kasaligan ang mga tinubdan sa impormasyon.
Quarantine
Nakuyawan man ko ining advisory sa Bureau of Quarantine nga nangita karon sa mga pasahero sa Flight 5J 241 (Hongkong-Cebu); Flight DG 6519 (Cebu-Dumaguete); ug PR2542 (Dumaguete-Manila).
Mao kini ang mga flight nga nasakyan sa duha ka Insek nga dunay novel coronavirus diin usa kanila ang namatay.
Giawhag sa Bureau of Quarantine ang mga pasahero sa maong flight nga paadtuon sa San Lazaro Hospital, sa RITM, ug sa labing duol nga hospital. Basin daw nga kining maong mga pasahero mga carrier karon ug nagtakod sa kagaw sa ubang mga tao.
Kon naa may natakdan nga sakay sa maong mga flight, pila kaha ka buok no? Pilay naa sa Sugbo karon? Dayon, sa miaging Enero 21 pa ang duha ka flight ug Enero 25 ang gikan sa Dumaguete padulong sa Manila.
Pila na man na ka adlaw oi? Kahadlok diay. Nya wala kitay mapalitan og maskara. May pa si Dracula kay mahadlok pag Krus. (@anol_cebu sa Twitter)