KUWANG. Tungod sa kakuwang sa husto nga kasayuran kabahin sa 2019 novel corona virus-acute respiratory disease (2019-nCoV-ARD) nga didto nagsugod sa Wuhan City, Hubei, China, ang atong mga kaigsuonan gikuyawan labina sa balita nga namatay niadtong Sabado sa Manila ang usa ka intsik nga lalaki, 44 anyos, nga naigo sa corona virus.
Daghan sa atong kaigsuonon nabalaka ug nahadlok nga matakdan niini kay makamatay man ning maong virus.
Niadtong Dominggo, daghan ang naglinya sa mga botika aron mopalit og face mask.
Gani, daghan ang di makatuo sa kalangay Duterte administration sa pagmando nga di na pasudlon sa atong nasud ang mga turista, di lang ang mga intsik apan lakip na bisan kinsa, gawas sa Filipino, nga gikan sa Tsina.
Human nakompirma pinaagi sa World Health Organization (WHO) nga ang usa ka lalaki nga intsik nga gikan sa Wuhan namatay niadtong Sabado sa San Lazaro Hospital, nagpakanaog dayon si Presidente Duterte sa maong kamanduan nga naglakip na usab niadtong gikan sa Hong Kong ug Macao.
Samtang ang mga opisyales sa Department of Health (DOH) nagdikidiki og pahibawo nga dunay kompirmado nga nataptan sa corona virus ug namatay sa hospital niadtong Sabado, pasalamat ta sa WHO nga nagpahibawo dayon pinaagi sa social media. Kon ang WHO wa pa magpahibawo nga dunay namatay sa 2019-nCoV-ARD niadtong Sabado, motug-an kaha ang DOH?
Kagahapon ang Malakanyang nagpahigayon og press conference tungod sa kabalaka sa kadaghanan pagkahibawo nga dunay namatay sa 2019-nCoV-ARD. Ang DOH nagpahinumdum na usab kanato sa pag-anad sa paghugas sa atong mga kamot labina human og gamit sa kasilyas.
Samtang nagsuwat ko ning akong lindog gahapon sa buntag, naminaw ko sa press conference nga gipahigayon sa Malakanyang. Si PCOO Sec. Martin Andanar nagpahibawo nga dunay cabinet meeting si Presidente Duterte sa hapon.
Ang temporary travel ban nga gimando ni Duterte di malalis nga giprotektahan sa kasamtangan nga administrasyon ang maayong relasyon sa Tsina nga dili maguba. Ingon ani kadako ug kataas ang respito ni Presidente Duterte sa iyang higala nga si China President Xi Jinping kay pung pa ni Sen. Bong Go, ang sinaligan ni Presidente Duterte, ang temporary travel ban wa magpuntirya sa mga intsik nga turista.
Gani, di pa tingali tungod sa maayong relasyon sa kagamhanan ni Presidente Duterte sa Tsina dugay ra nga iyang gimando nga di na pasudlon sa atong nasud ang mga turista gikan sa Tsina. Didto sa Amerika ug Europa sa walay paglangay nagpagawas dayon og travel ban sa mga tawo nga mibayahi gikan sa Tsina.