SAKTO sa pahuway ug tukma nga pagkaon ang sekreto ni lola Juana Lumaad Roble nganong naabot siya sa edad nga 106.
Si lola Juana nagselebrar sa iyang adlaw nga natawhan niadtong Enero 27, 2020.
Si lola Juana lumad nga taga Inopacan, Southern Leyte apan naa na nanimuyo sa Barangay Sabang, Siyudad sa Danao.
Siya ang labing tiguwang nga buhi sa tibuok probinsya sa Sugbo ug nakadawat nag P100,000 gikan sa Kagamhanan sa dakbayan sa Danao ug laing P100,000 gikan sa Probinsya sa Sugbo.
Siya gihatagan sa national government og P50,000 niadtong 2016.
Pagkaon
Matod sa kamanghurang anak ni Lola Juana nga si Dr. Nerita Roble-Alonzo, 64, nga ang sekreto sa taas nga kinabuhi sa iyang inahan mao ang sakto nga gikaon.
Ka usa lang sa usa ka semana mokaon og karneng baboy ang iyang inahan. Unod lang usab ang kan-on samtang ang inadlaw-adlaw nga kaonon niini mao ang utan kamunggay ug presko nga isda.
Gawas sa iyang pagka mainampingon sa pagkaon, mainampuon usab kini matag gabii sa dili pa matulog.
“Ang lifestyle ana niya mokaon lang na siyag karne Sunday ra. Nya kanang unod gyud sa baboy nya from Monday to Saturday isda ra gyud na, either sinugba basta naay utan nga kamunggay,” matod ni Dr. Alonzo.
Gikan sa pagkamatngon niya og buot, matag buntag moinom na ang iyang inahan og gatas.
“Sakto gyud na siya sa katulog. Mopahuway gyud na siyag after lunch. Nya kanang sa gabii, matulog gyud na siyag sakto gyud, 8 hours,” dugang ni Alonzo.
Kaliwat sab
Matod ni Alonzo nga taas og kinabuhi ang ilang kaliwat sanglit namatay ang ilang apohang lalake sa edad nga 104 samtang ang iyang amahan nitaliwan sa edad nga 93 human ma dakin-as gikan mituman sa sugo sa lawas sa pansayan.
Siya na ang nag-atiman sa iyang inahan sukad nga nagpangidaron kinig 90 tungod kay iyang gi monitor ang pagkaon niini tungod kay gusto pa niya nga magdugay pa ang iyang inahan sa kalibutan.
Sukad niadtong 2010, gatas ug instant cereal nalang ang gikaon niini, dunganan sa vitamins.
Sa nag edad pag 90 si Lola Juana, matod ni Dr. Alonzo nga aduna kini asthma, apan nawagtang kini sa dihang miabot og 100 anyos.
Ang apo ni Lola Juana nga si Jose Emery "Joy" Roble, presidente ug chief executive officer sa Roble Shipping Company, mapasigarbohon sa naabot sa iyang apohan.
Iya kining gihulagway nga champion sa kinabuhi tungod sa ka taas na sa pangidaron.
Si lola Juana adunay 11 ka mga anak, apan siyam na lang ang buhi karon, nga ang labing taas og pangidaron 80 anyos.
Bisan nga di na kaayo maka estorya sa Lola Juana ug makadungog, maklaro sa iyang panagway nga malipayon siya sa iyang pagselebrar sa iyang adlaw nga natawhan uban sa iyang mga anak ug apo.
Ang labing paborito nga apo niini mao si Joy Roble, kinsa bisan tingog lang ang iyang madunggan,mongisi ug mokatawa kini dayon.