ANG Provincial Prosecutor’s Office mipasaka og kasong serious illegal detention batok kang Dumanjug Vice Mayor Erwin “Wado” Gica ug laing duha ka mga kauban base sa reklamo sa usa ka lumolupyo nga sakop sa kaatbang nila sa pulitika.
Apan si Dumanjug Mayor Guntrano “Gungun” Gica wa maapil sa kaso kay wa mamatud-i nga apil siya.
Nipasaka og kaso sa magsuong Gica, apil kanila ni Gino Do ug Raymond Lañojan, mao si Hector Quirante, taga Barangay Ilaya sa mao nga lungsod.
Gawas sa kasong illegal detention, gipasakaan usab ang maguwang ug manghod nga Gica ug ilang mga kauban og planting of evidence, grave coercion, serious physical injuries ug kalapasan sa Commission on Elections (Comelec) gun ban.
Ang laing mga kaso gibasura.
Sa siyam ka pahina nga resolusyon nga gipetsahan niadtong Enero 6, 2020 ug giaprobahan ni Provincial Prosecutor Ludivico Vistal Cutaran, si Assistant Provincial Prosecutor Reina Carmel Rivas niingon nga ang “complaint for serious physical injuries is deemed absorbed in the crime of serious illegal detention, being an element of the same.”
Gisuwayan og kuha ang habig ni Mayor Gica sa Sunstar Cebu, apan wa siya motubag.
Gi-dismiss usab ang mga kasong paglapas sa gunban, grave coercion ug planting of evidence tungod sa kakuwang og probable cause.
Si Quirante, campaign staff ni kanhi mayoral candidate Cesar Baricuatro, nipasangil nga gibabagan siya sa grupo ni kanhi konsehal ug vice mayoral candidate Gica niadtong Mayo 11, 2019 samtang nagsubay siya sa karsadsa sakay sa iyang motorsiklo padung na mopauli.
Gipasanginlan niya si Gica nga nikulata kaniya ug nition og pusil sa wa pa momando sa iyang mga bodyguard nga giingong armado, sa pagpasakay kaniya sa sakyanan ug gidala sa headquarter sa pinuy-anan sa mga Gica sa Barangay Sima.
Giingong gi-usban siya sa pagkulata ni Do sa pag-abot sa balay sa mga Gica.
Matod ni Quirante nga ang pagkulata kaniya nisangko sa iyang pagkaangol, pagkapangag sa atubangan niyang ngipon ug pagliki sa lain.
Nipasangil si Quirante nga gipusasan siya sa sud sa headquarters ug giingong gipakupot siya og pusil sa wa pa siya gitugyan ngadto sa police station.
Apan sa iyang counter affidavit, si Bise Mayor Gica niingon nga si Quirante nisuway sa pagpusil kaniya human kini nisuway sa pag-overtake sa ilang sakyanan samtang nagsubay sa karsada sa Barangay Kantangkas.
Matod niya nga iyang kauban sila si Do, Castro ug Lañojan.
Kalit nilang gipahunong ang ilang sakyanan hinungdan nga nakalitan si Quirante ug nahug gikan sa iyang motorsiklo hinungdan sa pagkaangol.
Naglinayugay sila si Quirante ug iyang mga kauban hangtod nga nailog nila ang .38 kalibreng revolver ug gipa-book nila sa police station nga gidakop pinaagi sa citizen’s arrest.
Matod ni Rivas nga wa siya makakitag lawful cause sa pagdakop ug pagbilanggo kang Quirante.
“In any case, not all respondents could be indicted for serious illega detention. To hold other persons of the action of one, conspiracy must be proven. Perusing complainant’s allegations, respondent Guntrano was not at the area when he (Quirante) was dragged to the vehicle and brought to Gica compound,” nagkanayon ang resolution ni Rivas. (REV, RTF)