GIDID-AN na sa pagsulod sa Sugbo ang tanang mga produktong baboy ug manok nga gikan sa Region XI sa Davao Region.
Kini human gikompirmar sa Bureau of Animal Industry (BAI) nga may 1,000 ka mga baboy ang nangamatay tungod sa African Swine Fever (ASF) sa lugar.
Tungod niini, usa ka executive order (EO) ang giluwatan ni Gobernador Gwendolyn Garcia pag ban sa tanang mga produkto sa baboy ug manok gikan sa Region XI (Davao Region) nga mao ang Davao de Oro, Davao Del Norte, Davao Del Sur, Davao Oriental ug Davao Occidental.
Lakip na niini ang mga produkto nga nasagol pagbutang sa mga produkto gikan sa Davao.
Ang ASF usa ka severe viral disease nga dako og epekto sa mga baboy sa nasud.
Giabisohan ang tanan nga mga sakop sa African Swine Fever (ASF) task force nga mahimong alerto ug mahimong sigurista sa pagsusi sa tanang produkto nga moagi sa mga pantalan ug paluparan.
Mga langgam gibantayan
Sa laing bahin, gimonitor karon sa mga doktor sa lalawigan sa Sugbo ang mga lugar nga sagad tugpahan sa mga langgam nga mibalhin gikan sa laing nasud ug ubang lugar ingon man ang may labing lapad nga poultry farm sa lalawigan.
Gipahibaw ni Dr. Mary Rose Vincoy, Provincial Veterinary Office head, nga lakip sa ilang gi-monitor karon ang isla sa Olanggo, isla sa Bantayan, lungsod Argao ug pipila ka bahin sa Cebu South Coastal Road (CSCR) kon asa ang labing daghan nga poultry farm.
Kini human gi cull ang 18, 000 ka mga manok sa syudad sa Shaoyang sa habagatan bahin sa probinsya sa Hunan, China.
Ang Chinese Ministry of Agriculture and Rural Affairs mikompirmar sa Dominggo, Pebrero 2, 2020 nga positibo sa laing virus ang hayop sa China nga mao ang gitawag og H5N1 bird flu.
Matod ni Vincoy nga ang virus “highly pathogenic,” buot pasabot may kapasidad nga makahatag og dakong epekto sa ubang mga manok ug ubang langgam.
Sa probinsya kon asa nag gikan ang maong sakit, moabot sa 4,500 na ang namatay nga mga manok tungod sa H5N1 avian flu.
Di hinuon kini direkta nga moigo sa mga tawo, apan kinahanglan nga mag bantay ang mga Sugbuanon nga nag atiman og mga manok o poultry tungod kay posible kining makuha gikan sa hayop ra usab.
Sa hinapos sa miaging tuig, si Garcia nipatuman og ban sa mga karneng baboy ug related nga mga produkto tungod sa ASF. (ANV)