MITAKDO nga usa na ka semana kagahapon gikan sa kalit nga kamatayon ni NBA superstar Kobe Bryant, apan nagpadayon gihapon ang mga kalihukan, ilabi na didto sa Amerika, nga gipahinungod ngadto kaniya - ug sa samang higayon nagpahasubo sa iyang biniling pamilya.
Padayon sab ang subsob nga nga imbestigasyon kon unsa gyud ang gamot sa kamatayon nga naglambigit sa usa ka helicopter nga na-crash niadtong Enero 26, 2020 (Enero 27 sa Pilipinas) nga gisakyan ni Bryant, uban sa iyang anak nga si Gianna, ug laing pito, lakip ang piloto.
Daghang mga nagkalainlaing angulo ug version ang gisubay karon sa mga awtoridad apan kining dili insaktong mga balita nga nanggawas, nakadugang lang sa kasub-anan sa pamilya ni Kobe.
Si Molly Carter, presidente sa Kobe Inc., sa ilang pamahayag, nagkanayon nga dunay mga tinubdan nga wa magpahingalan nga gikutloan sa mga media apan dili gani gikan sa pamilya ang gipangbutyag.
Iyang gipasabot nga wa pa gyud silay tawo nga gitugotan nga magrepresentar sa pamilya nga maoy magbutyag sa mga personal nga mga detalyi nga nagpalibot sa nahitabong trahedya, lakip na niini ang ilang mga biyahe nga magsakay sila og helicopter.
Nanghinaot sila nga respetohan lang una ang pribasiya sa pamilya ni Kobe samtang nagbangutan pa sila sa hitabo. Dili lalim ang ilang nadangatan karon ug wa pay nasayod kon unsay ugma niining mga nahabilin ni Kobe – makalahutay ba o lupigon ba sila ning sakit nga pagsuway – sa umaabot pang mga adlaw.
Pero taliwala ning tanan, wa kalikayi nga mahisgutan usab ang mga negatibong nahimo ni Kobe niadtong buhi pa siya.
Gitumbok mao ang kasong pagpanglugos batok ni Kobe Bryant niadtong 2003.
Si Abigail Disney, ang nagdumala karon sa The WaltDisney Company, ang mipagawas og sunodsunod nga tweets nga nagsaway kang Kobe tungod sa kasong lugos niadtong 2003.
“I haven’t said anything about Kobe so far because I felt some time needed to pass before weighing in. But yes, it’s time for the sledgehammer to come out. The man was a rapist. Deal with it.
"OK, time to bite the bullet and say something,” If you don’t like it, just stop following. First of all, yes, it is my business because I’m a woman who has herself been assaulted and spent my life knowing, loving and feeling for women for whom it’s been so much worse.
Ang tweet ni Disney gitubag og mga panghimaraot.
Napuno siya sa negatibong komento gikan sa mga fans ni Kobe ug ingon man sa mga ni sempatiya sa pamilyang Bryant.
Kining maong kaso wa gyud moabot og trial sa korte.
Ambot og unsay mensahe nga gustong ipaabot ning bayhana ngadto sa tibuok kalibutan.
Kon atong sakyan nga nagsubay siya sa adbokasiya sa kababay-an, nganong ning panahon sa kasakit man kini niya gihimo ug nganong karon ra man usab kini niya buhata?
Ang pagtimbaya sa kasub-anan maoy haom nga ipadayag karon ug dili pagduot sa nahitaboan. (jun.migallen22@gmail.com)