SUGDAN na sa Gilas Pilipinas karong Huwebes ang ilang pagpangandam alang sa Fiba Asia Cup qualifiers ubos sa paggiya ni interim national coach Mark Dickel.
Mao kini ang labing unang higayon nga ikahimamat ni Dickel ang mga sakop sa 24-man pool nga giporma sa Samahang Basketbol ng Pilipinas (SBP) kaabag ang PBA.
Si Dickel, kinsa aktibong team consultant sa Talk N’ Text KaTropa sa PBA, maoy gitahasan sa SBP nga mogiya sa Gilas Pilipinas alang sa pagpakigbatok niini sa Thailand karong Pebrero 20 ug Indonesia karong Pebrero 23 alang sa unang tipik sa Asia qualifiers.
Ang 24-man pool giporma nang daan sa SBP diin nagkuha kini og mga magduduwa sa PBA ug amateur rank.
Ang mga magduduwa sa PBA nga apil sa national pool mao sila si Kiefer Ravena, CJ Perez, Christian Standhardinger, Japeth Aguilar, Marc Pingris, Poy Erram, Roger Pogoy, Troy Rosario, Mac Belo, Matthew Wright, ug Ray Parks.
Naa sab sa national pool ang lima nga gipili alang sa specil rookie draft sa PBA nga sila si Isaac Go, Rey Suerte, Matt Nieto, Allyn Bulanadi, ug Mike Nieto.
Ang mga gikan sa amateur rank mao sila si Thirdy Ravena, Kobe Paras, Dave Ildefonso, Juan Gomez De Liano, Javi Gomez De Liano, Jaydee Tungcab, Justine Baltazar, ug Dwight Ramos. (ESL)