SA TUMONG ug katuyoan nga mapahibalo gayod ang mga Dabawenyo ug bisan ang mga kasikbit nga probinsiya sa Davao City, gitukod ug giablihan ang Davao City "Disaster Radio" niadtong Lunes didto sa RJ Homes Bldg., Pelayo-Legaspi St., Davao City.
Mismong si Davao City Mayor Sara Duterte-Carpio ang mi-inagura sa pagbukas sa dcDR Disaster Radio 87.5 Mhz sa FM frequency nga maoy mohatud sa pinakauna nga mga impormasyon kalabot disaster preparedness ug uban pang mga impormasyon gikan sa mga aktibidad sa lokal nga kagamhanan ning dakbayan.
Ang maong radyo dunay 24 oras nga regular nga programa diin gilangkuban kini sa mga lab-as nga mga balita sa sulod ug palibot sa siyudad.
"Nakita namo nga bisan pa og naay presence sa social media, TV, naa tay partnership sa mainstream media, there is still a need to reach out to more Dabawenyos about timely and correct information," tipik sa pamulong ni Duterte-Carpio atol sa pagbukas.
Madunggan ang dcDR sa tibuok Davao City ug bisan sa mga kasikbit nga rehiyon pinaagi sa partnership sa mga governors ug mga nagkadaiyang probinsiya sa Davao Region.
Mihatag og suporta sa dcDR ang mga gobernador nga sila Governor Claude Bautista sa Davao Occidental, Tyrone Uy sa Davao de Oro ug Nelson Dayanghirang sa Davao Oriental kinsa milagda og manifesto, uban ni Mayor Inday, nga nagpakita og suporta sa maong istasyon.
"If they have disaster preparedness or disaster projects that they want to share with the entire region, they can announce it through the dcDR so that everybody will know that this is a venue for the entire region," ingon ni Duterte-Carpio.
Milagda sab og memorandum of agreement ang Armed Forces of the Philippines alang sa ilang pagsuporta diha sa regular nga paghatag sa mga public disaster preparedness announcements. (Jeepy P. Compio/Davao City Information Office)