MATAG Biyernes sa gabii, sa alas utso ang takna, dunay usa ka pari nga motumaw lang pagkalit sa kapilyang bato. Diin siya gikan way nasayod. Unya magmisa siya. Ang kapilyang bato dugay nang natukod dinhi sa abagahan sa bungtod nga sakop sa balangay sa Santa Barbara. Kining bungtora nag-umbaw sa sityo Halok-Birhen diin ang panginabuhian sa mga lumolupyo mao ang pagpananom og mga lagtmon. Matahom ang sityo Halok-Birhen. Matod pa ni Ingko Enciong, ang labing tiguwang dinhi sa sityo, dili gyud siya malimot sa matahom kaayong sugilanon sa panaghigugmaay nilang Aurora ug Rodrigo.
Sumala sa sugid ni Ingko Enciong, batan-on pa siya niadto. Iyang ig-agaw si Aurora. Dinhi sa sityo Halok-Birhen si Aurora ang labing maanyag nga dalaga. Kon maghisgot tag mga bulak, ikatandi siya sa mahumot nga dama-de-noche. Unya may usa ka lalake nga taga lungsod, pag-umangkon sa Kura Paruko nga Katsila, nga nahasuroy sa sityo. Nakadayeg ang lalake sa katahom sa sityo, ilabi na nga aduna kiniy nag-agos nga tubod kansang tubig tin-aw ug bugnaw kaayong imnon. Dinhi nagkahimamatay sila si Aurora ug ang ulitawo nga ginganlan og Rodrigo.
Paglabay sa mga adlaw, nagkahigugmaay ang duruha. Matag takdol sa Buwan adto silang duha manuroy sa bungtod. Unya gitukod ni Rodrigo ang kapilyang bato. Lig-on ang kapilyang bato ug ang mga lumolupyo sa sityo Halok-Birhen mipili kang San Vicente Ferrer nga maoy patron. Matag Biyernes dunay pagahimuon nga katilingbanong pag-ampo alang sa umaabot nilang pangilin.
Alegre kaayo inig-abot sa ilang pangilin. Tanang mga lumolupyo mag-ihaw og binuhing hayop, sama sa baboy, kanding, baka, manok, ubp. nga maoy halad nila sa ilang patron.
Apan sa pagpanglabay sa mga adlaw kalit lang nagmagl-anon si Aurora, kay si Rodrigo wala na mopatim-aw sa kapilyang bato. May nag-ingon nga si Rodrigo mipauli na sa Espanya aron adto didto motiwas pagtungha sa pagka pari. Tungod niini si Aurora wala nay gawas-gawas sa ilang balay. May nakakita kaniya nga mogawas sa ilang balay inigtikyop sa kagabhion ug bisan og ngitngit ang palibot, motungas siya sa bungtod ug adto magpalabay sa mga takna sulod sa kapilyang bato.
MILABAY ang daghang katuigan ug ang kapilyang bato nagpabilin gihapon sa iyang nahimutangan. Gilumot-lumotan na ang mga bato nga bungbong niini. Si Aurora bisag tiguwang na kaayo naningkamot gihapon pagtungas sa bungtod aron sa sulod sa kapilya mangaliya sa Kahitas-an.
Unya nakugang lagi ang mga tawo kay duna na may pari nga mokalit pagtumaw ug unya magmisa matag alas utso sa gabii. Ug dili lamang tuyuon nga ang mga lumolupyo sa sityo Halok-Birhen motungas ug motambong sa misa.
“Kining Kapilyang Bato maoy larawan sa akong kabatan-on. Gitukod ko kini tungod sa akong gugma sa usa ka babaye nga akong gihigugma ug gipakamutya dinhi sa sityo Halok-Birhen. Mibalik ako matag gabii dinhi aron mabatyagan ko pag-usab ang pinitik sa akong kasingkasing.” Bugnaw ug medyo kagalkal ang tingog sa pari.
Ug unya may nahiabot. Usa ka tiguwang babaye nga nagkangukango na, si Aurora. Gitawag niya ang pari, “Rodrigoooo! Rodrigoooo! Dad-a na koooo. Andam na koooong mokuyog kanimoooo inigbiyaaa nimoooo dinhiiii!”
Milakaw si Aurora nga nagtikuko paingon sa altar diin ang kalag sa pari nga si Rodrigo misugat kaniya. Unya kalit silang nangahanaw. Ang mga lumolupyo nag-iyahay tinan-away sa katingala nga wala na si Aurora ug ang pari. Samtang didto sa balay nilang Aurora gisulod na ang iyang patayng lawas sa lungon. Nabugtoan siya sa iyang kinabuhi niana pang miaging gabii. (Katapusan)