NAGPABILING buhi ang paglaom sa Cebu-Casino Ethyl Alcohol Sharks human nila gipangpahit ang Bataan Risers, 75-65, niadtong Pebrero 3, 2020 sa 2019-20 Chooks-to-Go MPBL Lakan Season sa Strike gym sa Bacoor.
Ang nakapangangha niini, naangkon sa Sharks ang kadaugan bisan wala ang ilang usa sa labing mga sinaligan nga si Rhaffy Octobre.
Si Octobre, kinsa nag-average og 12.8 puntos ug 7.4 rebounds, wala nakaduwa gumikan kay aduna kini stiff neck.
Hinuon kuyaw nga nakaduwa si Harold Cortes aron tapakan ang haw-ang nga nabiyaan ni Octobre.
Gipangulohan ni Cortes ang kadaugan pinaagi sa iyang 16 puntos lakip na niini ang wala’y sipyat nga tulo ka three-point shots samtang nitampo og 13 puntos si PBA-bound William McAloney.
“Si Harold kasi, pagdating talaga sa mga crucial stretch, kailangan ko siya lalo na’t nawawala na si Jaybee (Mantilla), kapag dinodoble, hindi na ma-control ang bola, kaya kinailangan kong ipasok si Harold,” matod ni Sharks coach Noynoy Falcasantos.
Aron makakumpayot sa ikawalo ug katapusang luna sa playoffs alang sa Southern Conference, ang Sharks kinahanglang modaog sa katapusan nilang duha ka mga duwa batok sa Parañaque-Yabo Sports ug Batangas-Tanduay.
Gawas niini, mag-ampo sab ang Sharks nga mopabor kanila ang resulta sa nahabiling ubang mga duwa.
Ang Sharks kasamtangang naggunit og 14-14 nga rekord nga nagpahiluna kanila sa ikasiyam sa South standing sunod sa Bicol Volcanoes nga ninghuman sa ilang tahas sa elimination phase dala ang 16-16 nga baraha. (ESL)