NAHILAKIP ang mga Sugboanong sila si John Febuar Ceniza ug Elreen Anne Ando sa mga sakop sa Philippine national weightlifting team nga mokampanya sa 2020 IWF Asian Championships sa Kazakhstan sa sunod buwan.
Kini nga kompetisyon maoy katapusang qualifying event alang sa 2020 Tokyo Olympics nga ipahigayon karong Hulyo 24 ngadto sa Agusto 9 sa Japan.
Sa miagi lang semana, ang Philippine team maayo og gipakita sa Roma 2020 Weightlifting World Cup sa Pala Pellicone sa Italy diin nakabira ang team og tulo ka gold medals ug tulo ka mga bronze.
Si Ceniza, kinsa silver medalist sa miaging 30th Southeast Asian (SEA) Games, nakaangkon og bronze medal sa Italy event.
Sa iyang gipakita sa Italy, si Ceniza aduna na’y dakong poruhan nga maka-qualify sa Olympics diin ikauban niya ang bantugang weightlifters sa Pilipinas nga sila si Nestor Colonia ug Olympic silver medalist Hidilyn Diaz.
Sa Italy event, si Diaz maoy mihakot sa tanang tulo ka gold medals sa Pilipinas nga gikan sa 93kgs sa snatch, 119kgs sa clean and jerk, ug total 212kgs.
Misaka na karon si Diaz sa No.4 sa world ranking nga nag-abli og dakong pultahan aron maka-qualify siya alang sa Tokyo Olpympics.
Ang Philippine Sports Commission (PSC) nihatag og P2.2 million nga pundo nga gigamit sa pito ka weightlifters ug upat ka mga opisyal nga nagrepresentar sa nasod sa Italy competition.
Wala pa kini labot sa P1.7 million nga gihatag ngadto sa kaugalingong team ni Diaz.
“This is an Olympic qualifying tournament for our national weightlifters. Walang dahilan para hindi natin sila bigyan ng full support,” pasabot ni PSC chairman William Ramirez. (RSC, ESL)