HUGOT ang desisyon ni Gobernador Gwendolyn Garcia nga dili ipadala ang tanan nga mga atleta nga moapil sa Central Visayas Regional Athletic Association (Cviraa) bisan pa man og giirog ang kompetisyon sa Marso tungod sa hulga sa 2019 novel coronavirus acute respiratory disease (2019-nCoV ARD).
Gikwestyon ni Garcia ang sakop sa Local School Board atol sa gipahigayon nga pulong niini Pebrero 4, 2020 tungod alang niya dili kinahanglan nga mopadala og daghang mga atleta nga mag-risgo sa mga tinun-an sama sa nahitabo nga insidente sa Boljoon nga mikalas og kinabuhi.
Kini human mihangyo si Department of Education (DepEd) Province head, Dr. Marilyn Andales kon mamahimo ba nga magpadala sila og atleta nga maoy mahimong representante sa Sugbo sa Cviraa karong Marso, kini taliwa sa gipasar nga resolusyon sa Disyembre 13, 2019 pinaagi ni Liloan Mayor Christina Frasco nga inay moapil sa indigay sa paugnat sa kusog mas hatagan og bili ang academics.
Matod ni Garcia nga dili siya matandog sa hulga sa mga school district supervisors tungod lang sa iyang pag dili pagpa-apil sa mga tinun-an sa maong paugnat sa kusog.
"That's probably why some of these district supervisors hiding behind pseudonyms pulos nanghulga nako nga dili na kuno ko padag-on sa sunod eleksyon kay ang CVIRAA kuno wa kuno nako gipadayon, besides dili ni about sa election its about who is best, what is best for our students and the province", matod ni Garcia.
Dugang niya nga ang pag dili niya usa ka lakang pagpanalipod sa mga tinun-an panahon nga mo byahe kini kauban sa mga motan-aw sa kompetisyon.
Gawas sa risgo nga atubangon sa mga tinun-an sa pagbiyahe, ang risgo usab sa panglawas niini ilabi na sa nagpadayon nga pag obserbar karon sa mga nag positibo sa 2019- nCoV ARD.
Ang CVIRAA gikatakda nga ipahigayon sa Marso sa Siyudad sa Dumaguete.
Buot ni Garcia karon nga kon gani mopadala og atleta sa maong kalihukan sigurohon og pilion daan ang katong maka-mao tungod kay kini usa ka kompetisyon.
Tungod niini, susihon pag usab sa sakop sa DepEd Province ang listahan sa mga atleta nga mipasundayag sa katakos niini og maoy ipadala sa maong kompetisyon. (ANV)