MAKATAGAMTAN na unya og suga pinaagi sa solar energy ang duha ka mga dagkong tunghaan sa isla sa Hingotanan sa Bien Unido, Bohol.
Kini pinaagi sa Project Renewable Energy for Livelihood and Youth (Rely) sa Vivant Foundation, Sequa gGmbH, ug Process Bohol Inc. nga nagtingunha nga mapalambo ang paggamit sa renewable energy.
Enero 23, 2020 gisugdan ang pag-upgrade sa electrical wiring system sa Hingotanan Elementary School. Nag-una ang upgrading sa Hingotanan National High School.
Ang duha ka tunghaan nahimutang sa “off-grid” nga lugar o katong walay linya sa kuryente. Gikinahanglan pa mubiyahe og usa ka oras ug tunga gikan sa Talibon, Bohol paingon sa isla sa Hingotanan.
Katambayayong sa pag-rewire sa duha ka mga tunghaan ang mga tinun-an sa Senior High School sa San Jose National High School sa Talibon nga nagkuha og Electrical Installation and Maintenance (EIM).
Matod ni Shem Jose Garcia, executive director sa Vivant Foundation, nangita sila og mga tunghaan nga adunay EIM course aron makauban sa proyekto.
Lakip sa Project Rely ang paghatag og training sa mga tunghaan nga adunay EIM course apan walay igong kahanas sa solar energy.
“We update the electrician course to include the solar component. So this way, the schools are helping each other out. The off-grid school gets electrified, while the Senior High School (students) with the electrician course get to have the work experience, they got the hours that are needed for graduating to get their Tesda certifications,” asoy ni Garcia.
Gikalipay sa officer-in-charge sa Hingotanan Elementary School nga si Esmeralda Cabansay ang pag-abot sa Project Rely sa ilang dapit.
“Nalipay mi niining maong project kay makagamit nami og kumpleto nga kuryente. Naa mi generator pero di man gud mi makagamit ana og dugay,” matod ni Cabansay.
Ang maong tunghaan nga adunay 731 ka tinun- an sa elementarya makagamit lamang og generator alas 7 hangtod alas 11 sa buntag samtang ala 1 kutob alas 5 sa hapon.
Gawas sa mga tunghaan sa Hingotanan, laing 11 pa ka mga “off-grid” nga tunghaan sa Bohol, Cebu, ug Palawan ang matabangan sa Project Rely.
Ang pondo sa maong proyekto naggikan sa suporta sa European Union ubos sa Sustainable Energy Programme.
Gikatakdang makumpleto ang Project Rely sa Hulyo 2021.