MAYORIYA sa empleyado sa Visayan Electric Company nibotar uyon sa strike nga gipasaka sa unyon niini batok sa management sa electric company.
Sa strike vote referendum sa 131 ka empleyado, 121 ang niuyon sa strike, 7 ang dili uyon samtang 4 ang invalid votes apan nibotar gihapon kini og “Yes.”
Wala malakip ang ilahang botar human gisuwat niini ang “Yes” imbes nga i-check ra kini base na usab sa rules sa National Conciliation and Mediation Board (NCMB) sa Department of Labor and Employment.
Samtang giklaro sa kadagkuan sa Visayan Electric pinaagi sa pamahayag niini nga gipatuman na nila ang mando sa Dole nga salary increase niadto pang Septiyembre 6, 2019.
Ang maong strike gisang-at kini sa Visayan Electric Company Employees Union (Veceu) human daw wala gipatuman sa Visayan Electric management ang bag-ong collective bargaining agreement (CBA) nga nasabutan sa duha ka kampo.
Matod ni Rolando Jimenez, presidente sa Veceu, nga natuman sa Visayan Electric ang usbaw sa ilahang suholan nga P1,750 matag tuig diin gihatag sa management ang usbaw sa nakalabay nga tulo ka tuig niadtong 2019.
Apan niklaro si Jimenez nga bisan paman sa maong lakang, wala gihapon gipatuman ang CBA nga nasabutan sa duha ka kampo ug daw naglangay ang Visayan Electric management sa pag-incorporate niini nga mao ang mando sa Dole.
Sa Notice of Resolution ni Dole Secretary Silvestre Bello III, gihatagan og 15 ka adlaw ang Visayan Electric sa pag-execute sa tulo ka isyu nga giisa sa unyon sa maong kompaniya.
Lakip sa isyu nga giresolbar sa Dole mao nga hatagan og meal subsidy kadtong mag-overtime nga empleyado, dili ipugos ang non-disclosure agreement sa mga empleyado ngadto sa kompaniya, ug usbaw nga P1,750 sa matag empleyado matag tuig.
Ang maong mando, giluwatan kini Nobiyembre 2019.
“Contrary to Veceu’s claim, the Visayan Electric Company has already signed its final draft of the new Collective Bargaining Agreement (CBA) that incorporates the Dole Order, for transmittal to and signature of the Veceu negotiating panel,” pamahayag sa Visayan Electric.
Ang Visayan Electric nipasalig usab sa publiko nga dili mabalda ang operasyon nila subay sa maong issue.
Sa pagkakaron anaa’y 22 ka adlaw base sa balaod nga dili una mohimo og strike ang unyon human sa botasyon nila kabahin sa NOS. (HBL)