WALA nay kinabuhi nga napalgan sa iyang ginikanan ang usa ka 18-anyos nga dalaga sulod sa iyang lawak sa Barangay Sabang Proper, isla sa Olango, dakbayan sa Lapu-Lapu sa milabayng Lunes sa gabie Pebrero 3.
Ang naasoyng dalaga nga nailhang si Daiza Salazar gituohang naghikog base sa sugilon sa inahan niini ngadto sa Police Station 1 sa Lapu-Lapu City Police Office (LCPO).
Apan ang nakapahibulong sa kapulisan nga walay samad ug wala maghigot sa liog ang biktima. Giingong wala na lang gyud kini kinabuhi dihang napalgan sa iyang inahan.
Gisuwayan pa unta kini ug dala sa Sta Rosa Community Hospital apan giingong wala na gyud kini matabang.
Nahitabo usab ang insidente pasado 7:00 sa Lunes sa gabie Pebrero 3 apan Martes na sa udto Pebrero 4 nitaho ang mga ginikanan niini ngadto sa kapulisan.
Matod ni Police Senior Master Sergeant Erwin Suson ang chief investigator sa Police Station 1 sa LCPO nga unang gidudahan unta sa kamatayon ni Salazar mao ang posibilidad nga miinom kini ug hilo apan wala man usab magbuwa ang baba niini sumala sa iyang mga ginikanan.
Aron matubag ang mga pangutana sa hinungdan sa kamatayon niini ila untang gitambagan ang ginikanan ni Salazar sa pagpa autopsy sa iyang patayng lawas apan nagdumili matod pa nagdumili kini.
“Hasol naman kuno sa ilang part ingon sila unya hugot man ilang pagtuo nga nag suicide kuno gyud ni, basin giatake pud pero di ta ka conclude kay subject for autopsy gyud unta ni pero di man gyud sila mosugot,” matod ni Suson.
Laing gitan-aw usab nga posibleng rason nga gisusi sa kapulisan mao ang posibilidad nga na-depressed ang biktima nga maoy hinungdan sa iyang kamatayon.
Kini human nga nakahisgot kanila matod pa ang mga ginikanan niini nga adunay nagpataka og estorya kalabot sa pagka babaye ni Salazar nga iya ra usab nga higala.
“Naa silay gipresentar (ang pamilya) nga kuan sir text messages nga gipakauwawan kuno ni, murag estorya nga naa kuno lain uyab ni si Daiza unya nahilabtan na kuno unya ang iyang current nga uyab nituo anang estoryaha bisag giunsa niya pag-defend iyang kaugalingon di man mutuo iyang uyab, di sad ingon nga kanhi uyab (ang nagpakalat) murag something nga m.u.-m.u. siguro kay wa man kuno to niya nauyab,” pagpasabot ni Suson.
Si Salazar Grade 12 sa usa ka pribadong tunghaan sa Brgy Pajo, dakbayan sa Lapu-Lapu. (GCM uban sa taho ni Teteth Mata)