NASIKOP sa mga sakop sa Philippine National Police Intelligence Group 7 inabagan sa Regional Intelligence Division 7 ang gikatahapang miyembro sa Abu Sayyaf Group nga kaalyado sa Daulah Islamiyah nga naglihok sa Zamboanga Del Norte.
Ang nasikop mao si Jimmy Igpit Marababol, kinsa dunay warrant of arrest nga giluwatan ni Judge Anthony T. Isaw sa Regional Trial Court 9 Branch 28 sa Liloy, Zamboanga Del Norte.
Si Marabol nag-atubang og mga kasong kidnapping ug serious illegal detention human niya dagita ang anak ni Mayor Eddie Quimbo nga si Jed sa lungsod sa Labason, Probinsya sa Zamboanga Del Norte niadtong Septiyembre 6, 2017.
Nahitabo ang pagpanagit sa merkado sa Barangay Antonio sa lungsod.
Walo ka mga armadong kalalakin-an nga gipangulohan ni Marababol ang nidagit kang Jed.
Matod ni Police Brigadier General Valeriano de Leon, hepe sa Police Regional Office 7, nga nakabuhi si Jed ug human niadto nilayas si Marabol paingon dinhi sa Sugbo.
Diha siya nagpuyo sa usa sa mga barangay sa Siyudad sa Mandaue ug nagnegusyo nag bugas.
Usa sa iyang mga transaction mao ang pag-angkat og daghang sinakong bugas gikan sa Mindanao.
Si Police Lieutenant Colonel Arturo Braul, hepe sa Intelligence Group 7, nagkanayon nga aduna nay record sa Zamboanga si Marababol sa kasong illegal possession of firearms, apan nakapyansa.
Sukad si Marabol nagtago-tago, nagnegusyo na siya og bugas dala ang laing ngalan nga wala pa gitug-an sa kapulisan.
Taas nga panahon ang pagpaniid sa akusado human sila makadawat sa kasayuran nga naa ra siya sa Dakbayan sa Sugbo nag tago-tago.
Gahapon Pebrero 4, alas 11:00 sa buntag, naabtan pa sa kapulisan si Marabol sa dalan MJ Cuenco, Barangay Tinago, Siyudad sa Sugbo nga nag transact og 3,000 ka sakong bugas humay.
“He was arrested for illegal possession of firearms. When he bailed out, nagtago napo sya dito sa Cebu. So just to further cover his status as member of the Abu Sayyaf Group, nag-ano sya dito as trader. So, he is involve in sa mga mining charcoal at saka doon sa pagbebenta ng mga bigas,” matod ni Braul.
Gisubay na karon kinsa ang iyang mga contact dinhi sa Sugbo nga giila na usab nga mga persons of interest lakip na ang posibling mga kauban niini gikan sa Mindanao.
Gipasalig hinuon ni de Leon nga bisan sa presensya sa Abu Sayyaf dinhi sa Sugbo, luwas ug malinawon pa ang tibuok Central Visayas tungod kay kontrolado pa nila ang tanan ug walay angayan nga ikabalaka sa siguridad sa mga Sugboanon.
“We would like to inform the people in Central Visayas that everything is under control. We are safe in the region, and we still believe that everything that we have this kind of positive actions is brought about by the community cooperation,” matod ni de Leon.
Wala mohatag sa iyang pamahayag si Marabol sa dihang gisuwayan pagkuha sa iyang habig tungod kay ang iyang abogado na ang motubag sa tanan.
Apan mi lingo-lingo kini sa dihang gipangutana kung unsa ka tinuod nga sakop siya sa Abu Sayyaf. (dugang taho nila ni FMD, GPL)