LIMA ka mga lalaki ang mitulis sa usa ka lending firm mga alas 11:45 sa buntag niadtong Martes, Pebrero 4, 2020, sa 21-20 streets, Barangay Nazareth, sa siyudad sa Cagayan de Oro.
Nakadawat og tawag ang Police Station 9 (PS9) sa Macasandig nga dunay pagpanulis nga nahitabo sa Card SME Lending Firm.
Giingong misulod ang lima ka mga indibidwal nga armado ug gidudahang kalibre .45 ug gilimas ang P54,950 lakip mga cellphone sa maong establesmento.
Ang mga suspek gihulagway nga nagsul-ob og long pants, adunay nag-short pants, naka jacket og itom ug helmet nga daling misibat human nabitbit ang tinguha.
Si Cagayan de Oro City Police Director Police Colonel Henry Dampal nimando na sa kapulisan nga pangitaon ang suspek pinaagi sa paglusad ug checkpoints sa entry ug exit nga bahin sa siyudad.